د MTN مخابراتي شبکې عمومي رئیس سره د مخابراتو او معلوماتي ټکنالوجۍ وزیرې د پیژندنې ناسته
د مخابراتو او معلوماتي ټکنالوجۍ وزیرې معصومه خاوري د ام ټي ان مخابراتي شبکې عمومي رئیس عباد ردا سره وکتل.
پدې غونډې کې د ام ټي ان شبکې رئیس د ګډې همکارۍ او د مخابراتو په سکتور کې د یو شمیر ننګونو د حل په اړه خبرې وکړې او پدې برخه کې یې د مخابراتو او معلوماتي ټکنالوجۍ وزارت له مشرتابه څخه د پاملرنې او همکارۍ غوښتنه وکړه.
د مخابراتو او معلوماتي ټکنالوجۍ وزیرې معصومې خاوري ښاغلي عباد ردا ته د ښه راغلاست پرمهال څرګنده کړه چې د مخابراتو په سکتور کې ډیره پانګونه شوې ده او هیوادوالو ته د لا غوره خدمتونو وړاندې کولو لپاره ګډ او هدفمن کار ته اړتیا شته.
د مخابراتو او معلوماتي ټکنالوجۍ وزیرې همدا راز ټینګار وکړ چې د مخابراتو وزارت د خپلو دندو او مسؤلیتونو په چوکاټ کې هڅه کوي ترڅو د مخابراتي شرکتونو د خدمتونو د ودې، پراختیا او غوره کیفیت لپاره اړینې تګلارې وړاندې او اجراات ترسره کړي.
