په سایبري فضا کې د ښځو ځواکمنتیا لپاره د پوهاوي ورکشاپ جوړ شو
یاد ورکشاپ د اطلاعاتو سیسټمونو د امنیت ریاست او د مخابراتو او معلوماتي ټکنالوجۍ وزارت د بشري سرچینو ریاست لخوا د سایبري امنیت په برخه کې د ښځو د پوهاوي لوړولو په موخه د دوه ورځو لپاره په لاره اچول شوی و.
په دې ورکشاپ کې شاوخوا ۶۰ تنو ښځو برخه اخیستې وه.
د ورکشاپ په لومړۍ ورځ، سایبري فضا، ویجاړونکي سافټویرونه، ویروسونه او د لیږدیدو څرنګوالی، د ویروس ډولونه او په کمپیوټر کې د ویروس نښې نښانې، کمپیوټر ته د ویروس د ننوتلو مخنیوی او د فیسبوک امنیتي لارښوونې فعالولو لارې، په دویمه ورځ د سایبري جرایمو موخې، د سایبري جرمونو ډولونه او د دې مخنیوي لارې، د فشینګ برید لینک، د سایبري جرم قانون د جزا کوډ، د WhatsApp امنیتي لارښوونې فعاله کول، هک کول او د مخنیوي لپاره یې عملي لارې هغه موضوعات وو چې دوی ته د پریزنټیشنونو له لارې تدریس شول.
د تدریس پرمهال، ګډونوالو هر یوه د موضوع اړوند پوښتنې راپورته کړې، چې د اطلاعاتو سیسټمونو د امنیت ریاست کارپوه ښاغلي محمد حسن جبارخیل او ښاغلي عبدالله سرفراز د هغوی پوښتنو ته ځوابونه ورکړل.
په سایبري فضا کې د ښځو د پیاوړتیا لپاره د پوهاوي پروګرام د مخابراتو او معلوماتي ټکنالوجۍ وزیرې معصومې خاوري لخوا د مارچ په اتمه د ښځو نړیوالې ورځې په مناسبت په لاره اچول شوی و. د اطلاعاتو سیسټمونو د امنیت ریاست رئیس ښاغلي محمد حسیني په وینا، ورته پروګرامونه به په راتلونکي کې د نورو وزارتونو لپاره هم په لاره واچول شي.
