د مخابراتو او معلوماتي ټکنالوجۍ وزارت وزیر د ام ټي ان مخابراتي شرکت رئیس سره لیدنه وکړه
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ام ټي ان مخابراتي شرکت رئیس ښاغلي هشام رمضان سره د ټي ډي اېف سایټونو په جوړولو، مخابراتي کیفیت ښه والي او همدا راز د کلني راپور په تړاو خبرې وکړې.
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني ام ټي ان مخابراتي شرکت ته هدایت وکړ چې د ارزګان ولایت په لرې پرتو او محرومو سیمو کې د ټي ډي اېف ۶ مخابراتي سایټونه نصب او فعال کړي تر څو یاد ولایت کې هغه سیمې له مخابراتي خدمتونو برخمنې شي چې لا هم محرومې دي، دغه راز دې لیدنه کې د هېواد په کچه د مخابراتي خدمتونو د پیاوړتیا او د کیفیت د ښه والي په موخه لازمې لارښوونې وشوې .
د ام ټي ان مخابراتي شرکت رییس ښاغلي هشام رمضان د مخابراتو او معلوماتي ټکنالوجۍ وزارت له رهبرۍ مننه وکړه چې تل یې هېواد کې د مخابراتي سکټور د پیاوړتیا په موخه کوټلي ګامونه اخیستي او پر وخت یې د مخابراتي سکټور ستونزې هوارې کړي دي، د ښاغلي رمضان په وینا دوی چمتو دي د ارزګان ولایت په محرومو سیمو کې د ټي ډي اېف ۶ مخابراتي سایټونه جوړ او ګټې اخیستنې ته یې وسپاري، د ښاغلي هشام رمضان په خبره دوی د کیفیت د ښه والي په موخه د نورو مواردو تر څنګ له افغان ټلیکام مخابراتي شرکت سره د فایبر په برخه کې د ۳نیم میلیونه ډالرو په ارزښت تړون هم لاسلیک کړی چې له مخې به یې دوی د خپل کیفیت لوړولو کې ترې ګټه واخلي.
د یادونې وړ ده دغې ناسته کې د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني ټینګار وکړ چې د مخابراتي سکټور د ودې او پرمختګ په موخه باید رسمي چارې د ټولو برخو له خوا په خپل وخت اجرا شي او هیڅ څوک باید رسمي چارې ونه ځنډوي.
ورته مهال د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ام ټي ان مخابراتي شرکت د راپور د ارزولو په موخه د مخابراتو او معلوماتي ټکنالوجۍ وزارت د اټرا رییس ښاغلي الحاج مولوي سید برات شاه آغا ندیم په مشرۍ یو پلاوی وټاکه چې راپور وه ارزوي او وروستۍ نتیجه یې له مقام سره شریکه کړي.
