د مخابراتو او معلوماتي ټکنالوجۍ وزارت مالي او اداري معین رسماً د وزارت کارکونکو ته معرفي شو
د عالیقدر امیرالمؤمنین شیخ القران والحدیث مولوي هبةالله آخندزاده صاحب حفظه الله تعالی د حکم پر اساس محترم مولوي محمد حنیف حمزه چې د مخابراتو او معلوماتي ټکنالوجۍ وزارت د مالي او اداري معین په توګه ټاکل شوی د یوې رسمي غونډې په ترڅ کې د مخابراتو وزارت کارکوونکو ته ور وپیژندل شو او دنده یې پیل کړه.
یاده غونډه چې د مخابراتو او معلوماتي ټکنالوجۍ وزیر محترم الحاج مولوي نجیب الله حیات حقاني په مشرۍ جوړه شوې وه د کلیو او پراختیا وزارت وزیر ښاغلي ملا محمد یونس اخندزاده د ریاست الوزرا عالی مقام د دفتر عمومي رییس محترم ډاکتر صاحب عبدالواسع، دچارو ادارې عمومي رییس شیخ الحدیث مولوي نورالحق انور، د دفاع وزارت معین محترم مولوي فاضل آخند، د ښارجوړونې وزارت معین، د برښنا امارتي شرکت اداري رییس او یو شمیر نورو چارواکو هم ګډون درلود.
لومړی د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د مخابراتو او معلوماتی ټکنالوجۍ وزارت نوي معین صاحب ته د نوې دندې د مبارکۍ ویلو ترڅنګ زیاته کړه چې دنده اخیستل یومسؤلیت دی او د ملت له امانتونو څخه شمیرل کیږي، په کوم کارکې چې د الله پاک چاته د خیر اراده وي نیک خلک ورته معاونین ټاکي او همدا راز ډاډ یې ورکړ چې د مخابراتو او معلوماتي ټکنالوجۍ وزارت رهبري به د یاد معینیت په اغیزمنه توګه د چارو په ترسره کولو کې له دوي سره همکاره وي.
همداراز د چارو ادارې عمومي رییس محترم شیخ الحدیث مولوي نورالحق انورصاحب خپله وینا کې د مخابراتو او معلوماتی ټکنالوجۍ په وزارت کې د محترم مولوي محمد حنیف حمزه د مالي او اداري معین په توګه د ټاکلو مبارکي وویله او زیاته یې کړه چې په اسلامي نظام کې په یو منصب باندې د شخص ټاکل د اسلامي اصولو له مخې او د تیرو کارکردګیوته په کتوسره د اعتماد په ترڅ کې ترسره کیږي چې د اسلامي نظام د استحکام باعث کیږي او محترم مولوي محمد حنیف حمزه صاحب ته یی په چاروکې د پوره اخلاص او په صداقت خدمت کولو د توفیق غوښتنه وکړه.
د چارو ادارې لوی رئیس ښاغلي شیخ الحدیث مولوي نورالحق انور د محترم مولوي محمد حنیف حمزه د ټاکلو په هکله د عالیقدر امیرالمؤمنین شیخ القرآن والحدیث مولوي هبة الله آخندزاده صاحب حفظه الله تعالی حکم قرئت کړ او نوموړي ته یې د نوې دندې مبارکي ویلو ترڅنګ زیاته کړه چې د امارت هر یو مشر د ملت خادم دی او د ملت خدمت باید ورته لومړی توب ولري.
