د مخابراتو او معلوماتي ټکنالوجۍ سرپرست وزیر امیرزي سنګین د یحی خیلو د پیښې له زخمیانو څخه په روغتون کې لیدنه وکړه
د افغانستان د مخابراتو او معلوماتي ټکنالوجۍ سرپرست وزیر ښاغلي امیرزي سنګین د دغه وزارت د مشرتابه او د پکتیکا ولایت د ستازو په ملګرتیا نن سهار د پکتیکا ولایت د یحی خیلو ولسوالۍ د ځانوژونکي تروریستي برید له ټپيانو سره د خواخوږي او مرستې کولو په موخه د۱۳۹۳ کال د لیندۍ ۴ مه د سردار محمد داود خان په روغتون کې له هغوي سره کتنه وکړه او خپله همدردي یې ورسره شریکه کړه.
ښاغلي امیرزي سنګین د دغې پیښې د غندلو په ترڅ کې وویل چې د ولسي وګړو په نښه کول د هغو دښمنانو کار دی چې ملکي وګړو ته د درد او غم له رسولو پرته، بل څه نه غواړي.
هغه زیاته کړه چې د افغانستان دښمنان د پرديو په اشارې سره د دا ډول ډارنو کړنو په ترسره کولو سره، له بې ګناه ولسي وګړو سره خپله څرګنده دښمني ښيي.
همدا راز ښاغلي سنګین ټپیانو ته دلازمې نغدې مرستې په ورکولو سره هغوی ته د لوی خدای له درباره څخه د عاجلې روغتیا هيله وکړه.
