د بدخشان د درواز بالا ولسوالۍ د خلکو ستونزې واورېدل شوې

د مخابراتو او مالوماتي ټيکنالوجۍ سرپرست وزير انجينر سيد احمد شاه سادات نن د بدخشان ولايت د درواز بالا ولسوالۍ له ولسوال او د خلکو له استازو سره وکتل. په سر کې د دواز بالا ولسوالۍ د خلکو په استازيتوب ښاغلي کامبېز قرباني خبرې وکړې او د دغه ولسوالۍ د خلکو مخابراتي ستونزې يې وړاندې کړې. د هغه په وينا چې درواز بالا ولسوالي ۷۲ کلي او ۳۵۰۰۰ نفوس لري خو يواځې يوه مخابراتي پايه پکې فعاليت کوي چې ټوله ولسوالي تر پوښښ لاندې نشي راوستلی. 

سرپرست وزير په دغه ولسوالۍ کې د مخابراتي پوښښ د حل لپاره د سلام مخابراتي شبکې د دوه پايو د ژر تر ژره نصبولو ژمنه وکړه او تر څنګ يې د مخابراتي خدمتونو د تنظيم ادارې (اترا) ته هدايات ورکړل چې د نورو شبکو پايې هم د مخابراتو د پراختيايي بوديجې TDF په مرسته نصب کړي. تر څو په دغه ولسوالۍ کې د مخابراتي پوښښ ستونزه کاملا حل شي.