د ډارک فیبر د قیمتونو د ټیټوالي په تړاو د مخابراتو او معلوماتي ټکنالوجۍ وزارت پلان د اقتصادي عالي شورا غونډې ته وړاندې شو
د روان 1397 کال د ثور د میاشتې په 4 مه نیټه د مخابراتو او معلوماتي ټکنالوجۍ وزیر ښاغلي شهزاد آریوبی د ډارک فیبر د قیمتونو د ټیټوالي د طرحې په تړاو معلومات د اقتصاد عالي شورا غونډې ته چې د جلالتمآب جمهوررئیس محمد اشرف غني په مشرۍ جوړه شوې وه وړاندې کړل.
په غونډه کې له هراړخیز بحث وروسته د ډارک فایبر وړاندیز شوې بیې تائید شوې، جمهوررئیس په دې اړه وویل، د ډارکفایبر د بیو د کموالي په برخه کې دې یو واضح میکانیزم جوړ او د تدارکاتو ملي ادارې د معیارونو په پام کې نیولو سره دې د قرارداد یو موډل هم جوړ شي.
غونډې دغه راز پریکړه وکړه چې د جمهوررئیس، د جمهوررئیس د دویم مرستیال، دغه راز د اجرائیه رئیس او مخابراتي شرکتونو د استازو په ګډه غونډه کې به د مخابراتي شرکتونو د تمدیدي فیس د ټاکلو وروستی تصمیم ونیول شي.
