افغان جت کمپنۍ ته د پستي خدمتونو جواز ورکړل شو
د روان ۱۳۹۲ کال د چنګاښ میاشتې په ۱۶ مه نیټه افغان جت خصوصي کمپنۍ ته د پستي خدمتونو د وړاندې کولو جواز د یو مطبوعاتي کنفرانس په ترڅ کې چې د مخابراتو او معلوماتي ټکنالوجۍ وزارت تخنیکي مرستیال په کې ګډون کړی و ورکړل شو.
په پیل کې د مخابراتو او معلوماتی ټکنالوجۍ تخنیکي مرستیال ښاغلي انجنیر بریالي حسام د پستي خدمتونو د ارزښت او اهمیت په اړه څرګندونې وکړې او ویې ویل: د افغان جت خصوصي کمپنۍ سره د پستي خدمتونو د وړاندې کولو او د جواز صادرولو څخه موخه خلکو ته د ښه ، چټک او با کیفیته پستي خدمتونو پراختیا او وده ده. هغه زیاته کړه: د مخابراتو او معلوماتي ټکنالوجۍ وزارت د نورو مخابراتي او انټرنیټي فعالیتونو ترڅنګ د ازادې سیالۍ له لارې د پستي خدمتونو ودې او مدرنیزه کولو هڅه کړې ده.
همدا راز د افغان جت کمپنۍ رییس ښاغلي سید سلیمان د دغه هوکړه لیک د لاسلیکولو څخه خوښي څرګند کړه او ویې ویل: زمونږ موخه هیواد والو ته د با کیفیته پستي خدمتونو وړاندې کول او د کاري بوختیاوو برابرول دي.
په پای کې د افغان پستي خدمتونو د تنظیم ادارې مشر میر عبدالرحمن صدري دپستي خدمتونو د ودې او کیفیت پر لوړولو ټینګار وکړ او جت کمپنۍ ته يې د لا بریالیتوب هیله څرګنده کړه.
