نن سه شنبه د وږې میاشتې شپږ ویشتمه نېټه، د مخابراتو سرپرست وزیر محمد فهیم هاشمي او ترانسپورت وزیر یما یاري تر مېنځ، د ترانسپورتي خدمتونو او ترافیکي اسانتیاوو د برېښنايي کېدو په موخه ګډه هوکړه لاسلیک شوه.
د مخابراتو سرپرست وزیر محمد فهیم هاشمي د هوکړه لیک لاسلیکولو په مراسمو کې وویل، دا به د هیواد د دیجتلي کېدو په برخه کې د افغانانو یو بل ستر ګام وي.
د نوموړي په وینا، د موټر چلولو برېښنايي جوازونو له وېش سره سم، د دواړو وزارتونو په ګډه همغږي، د برېښنايي جوازسیر وېشلو لړۍ د دغه وزارت یوه بله ستره لاسته راوړنه ده.
ښاغلي هاشمي وویل، د ټولو دولتي ادارو کاري چارې برېښنايي کول د دغه وزارت له کاري لومړیتوبونو څخه دي، چې دا لړۍ به لا هم دوام مومي.
هغه زیاته کړه، ترانسپورت وزارت چې د دغه هوکړه لیک پر اساس یې، د برېښنايي او دیچتلي کېدو چارې د اسان خدمت ادارې په مرسته تر سره کیږي، له مخابراتو وزارت سره همکار وزارت دی.
د سرپرست وزیر په وینا، د دولتي ادارو برېښنايي کېدل د مخابراتو وزارت او خپله د هیواد مشرتابه ښاغلي محمد اشرف غني له مهمو اهدافو څخه دي، چې مخابراتو وزارت به په دې برخه کې هیڅ راز هڅې ونه سپموي.
د ترانسپورت وزیر یما یاري په دغو مراسمو کې وویل، ترانسپورت وزارت د اصلاحاتو په برخه کې مخکښ وزارت دی او له مخابراتو وزارت سره به د خپلو ادارې چارو د برېښنايي کېدو په برخه کې لا زیاتې هڅې وکړي.
نوموړي زیاته کړه، ډېر ژر به د افغانستان ترافیکو ملي اداره له ترانسپورت وزارت سره له تړل کېدو وروسته، د دغې ادارې ټولې چارې دیجتلي شي.
د نوموړي په وینا، ډېر ژر به د ترانسپورت په برخه کې یو کار وړ او روڼ سیستم رامېنځته شي، چې دا چاره به د عوایدو، امنیت او ښاري اسانتیاوو په برخو کې د هیوادوالو پر ژوند مثبت اغېز ولري.