معصومه خاوري په مخاراتو وزارت کې د وزارت موخو ته د رسیدو د همغږۍ د زیاتوالي په خاطر د ۳۳ ولایتونو د مخابراتو رییسانو سره د ویډیو کنفرانس له لارې خبرې وکړې
د مخابراتو او معلوماتي ټکنالوجۍ وزیرې اغلې معصومې خاوري د ۳۳ ولایتونو د مخابراتو رییسانو سره د کابل ولایت د مخابراتو رییس او یو شمیر مرکزي چارواکو په شتون د ویډیو کنفرانس له لارې خبرې وکړې.
په دې ناسته کې د وزارت درې کلن ستراتیژیک پلان، د ژنیو کنفرانس کې د ژمنو تعقیب، د افغانستان د ډیجیټل کولو ملی کنفرانس، او د ډیجیټل مهارتونو وده او پراختیا لپاره د ولایتي روزنیز ورکشاپونو جوړولو په اړه بحث وشو.
د مخابراتو او معلوماتي ټکنالوجۍ وزیرې آغلې معصومه خاوري د ولایتي مسئولینو د هڅو د ستاینې پرمهال په ولایتونو کې د ډیجیټل کولو په برخه او لازمو کړنلارو جوړولو کې د چارواکو د هراړخیزو هڅو غوښتنه وکړه.
وروسته د ولایتونو د مخابراتو او معلوماتي ټکنالوجۍ رئیسانو هر یو په خپل وار سره؛ خپلې ستونزې ، وړاندیزونه او نظریات د وزارت مشرتابه سره شریک کړل.
په پای کې، میرمن خاوري د مخابراتو ولایتي رییسانو وړاندیزونو او نظریاتو اوریدلو پرمهال له دوي څخه وغوښتل چې د وزارت د درې کلن پلان په اړه په راتلونکو لسو ورځو کې خپل پلانونه او وړاندیزونه له وزارت سره شریک کړي تر څو دا ستراتیژۍ ژر تر ژره نهایی او پر اساس یې نورې پریکړې او اقدامات ترسره شي.
