روشن مخابراتي شرکت ته د 3G خدمتونو جواز ورکړل شو
نن شنبه د ۱۳۹۱ کال د تلې د میاشتې په لومړی نېټه د یوه مطبوعاتي کنفرانس په ترڅ کې د 3G جواز ورکړل شو
یاد کنفرانس چې د مخابراتو او معلوماتي ټکنالوجۍ وزارت د غونډو په تالار کې جوړ شوی وه دمخابراتو وزیر انجنیر امیرزي سنګین، د مالیې وزیر حضرت عمر زاخېلوال، د اقتصاد وزیر عبدالهادي ارغندیوال او عدلیې وزیر رحیم الله غالب او د روشن مخابراتی شرکت رهبري پلاوې ګډون درلود.
د مخابراتو او معلوماتي ټکنالوجۍ وزیر ښاغلي امیرزي سنګین په دغه غونډه کې وویل: د افغانستان حکومت هوډمن دی چې خپلو خلکو ته د پرمختللو هېوادونو په څېر پرمختللی مخابراتی خدمتونو وړاندې کړې، نو دې موخي ته د رسېدو په هیله موږ د مخابراتو په برخه کې نن یو بل د پرمختګ ګام اخلو او د روشن مخابراتي شرکت ته د 3G یا درېیم نسل ټکنالوجۍ جواز ورکوو.
نوموړي پرمختللی ټکنالوجۍ دهیواد په اقتصاد وده کې اړینه وبلله او وویل چې باید حمایه اوملاتړ یي وشي د مخابراتو او معلوماتي تکنالوجۍ وزیر زیاته کړه چې ددي جواز د صادریدو په صورت کې به، په راتلونکو دوه کلونو کې به ۵۰ سلنه وګړي له چټک انترنیټی خدمتونو څخه برخمن شي.
همدارنګه د مالیې وزیر ښاغلي عمر زاخلېوال د 3G جواز ورکړه اوهیواد ته دیادې تکنالوجی راتګ یو پرمختتلی ګام وباله او دا لاسته راوړنه يي د مخابراتو او معلوماتي تکنالوجۍ وزارت ته کارکوونکو او رهبري پلاوي ته مبارکي وویله.
د روشن مخابراتي شرکت ته د 3G جواز د ۲۵ میلیونو امریکایي ډالرو په بدل کې ورکړل شو، د یادونی وړده چې له اتصالات او MTN وروسته دا دریم مخابراتی شرکت دی چې د 3G جواز تر لاسه کوي.
