د کونړ ولایت په شیګل ولسوالۍ کې د سلام مخابراتي شبکې یو سایټ فعال او ګټې اخیستنې ته وسپارل شو
د مخابراتو او معلوماتي ټکنالوجۍ وزارت د پلان له مخې د کونړ ولایت شیګل ولسوالۍ کې د مخابراتي ستونزو د حل په موخه د لومړي ځل لپاره د سلام مخابراتي شبکې ۳جي او ۲جي مخابراتي سایټ د ټي ډي اف د لسمې پروژې په مرسته جوړ او د مخابراتي چوپړ د وړاندې کؤلو په موخه ګټې اخیستنې ته وسپارل شو .
د یاد مخابراتي سایټ په فعالېدو سره به د کونړ ولایت د شیګل ولسوالۍ اوسیدونکي له مخابراتي خدمتونو برخمن شي او کولای شي له انټرنټي او مکالماتي چوپړ ګټه پورته کړي.
د یادولو وړ ده کونړ ولایت په بیلابیلو سیمو کې تر دې مهاله د سلام مخابراتي شبکې ۱۰ سایټونه فعال شوي او د پاتې نورو سایټونو ودانیزې چارې روانې دي چې په دې سره به د یاد ولایت ګڼ شمیر سیمې تر مخابراتي پوښښ لاندې راشي.
او همدارنګه د شیګل ولسوالۍ اوسېدونکو د مخابراتو او معلوماتي ټکنالوجۍ وزارت له مشرتابه مننه وکړه چې د هېواد لرو پرتو سیمو ته یې ځانګړې پاملرنه کړې او هغه سیمې چې له ډېره وخته د مخابراتي خدمتونو څخه بې برخې وې اوس مهال ورته غوره مخابراتي چوپړ وړاندې کېږي.
