د چک جمهوریت سفیر له آغلې خاوري سره وکتل او د دوه اړخیزو همکاریو په اړه خبرې وکړې
د چک جمهوریت سفیر ښاغلي ایرژي بلاون د مخابراتو او معلوماتي ټکنالوجۍ له وزیرې آغلې معصومې خاوري سره د هغې د کار په دفتر کې وکتل او د دوه اړخیزو ګډو همکاریو په اړه یې خبرې وکړې.
په دې ناسته کې، د چک جمهوریت سفیر د مخابراتو او معلوماتي ټکنالوجۍ په برخه کې د خپل هیواد د ښو او بریالیو تجربو په اړه مفصل وضاحت ورکړ او یادونه یې وکړه چې هیواد یې چمتو دی په دې برخه کې د افغانستان د مخابراتو وزارت سره خپلو همکاريو ته دوام ورکړي.
د مخابراتو او معلوماتي ټکنالوجۍ وزیرې د افغانستان حکومت سره د چک جمهوریت له دوامداره حضور او همکاریو له امله د مننې تر څنګ یادونه وکړه چې وزارت د مخابراتو او معلوماتي تکنالوجۍ سکتور د ودې او پیاوړتیا لپاره د پوهې او تجربو تبادلې په برخه کې د دوستو هیوادونو د مرستو او همکاریو غوښتنه کوي.
د غونډې په پای کې، دواړو لوریو د مطلوبو موخو او همکاریو ترلاسه کولو لپاره په لا ډیرو اړیکو او همغږۍ ټینګار وکړ.
