د وزارت د بودیجې لګښت او د پراختیایي پروژو وضعیت ارزولو لپاره اوونیزه غونډه جوړه شوه
د بودیجې د لګښت اوونيزه غونډه د مخابراتو او معلوماتي ټکنالوجۍ وزیرې معصومه خاوري په ریاست د پراختیايي پروژو د یو شمیر رئیسانو او چارواکو په ګډون جوړه شوې وه.
په دې ناسته کې د ۱۴۰۰ مالي کال لپاره د پراختیایی پروژو حالت او پرمختګ او د بودیجې اغیزمن لګښت په اړه بحث او د نظر تبادله وشوه.
د افغانستان د معلوماتي ټکنالوجۍ پراختیایي پروژې، کاسا ډیجیټل، د ښوونې او روغتیايي سکتور لپاره د ځمکني سټیشن رامینځته کول، د انټرنیټ تبادلې مرکز (NIXA) پروژه، د افغانستان د معلوماتو ملي مرکز په کلاوډ بدلول او د بریښنایی تصدیقونو لپاره زیربنا رامنځته کول د وزارت مهمې پروژې دي چې په اړه یې جلا جلا بحث او خبرې وشوې.
دې ناستې ته د اړونده پروژو رییسانو او چارواکو، د تیرو لارښوونو سره سم، د ورسپارل شويو دندو په پلي کولو کې د خپلو اجرااتو راپورونه وړاندې کړل.
د مخابراتو او معلوماتي ټکنالوجۍ وزیرې د غونډې د غړو د راپورونو اوریدو وروسته اړونده مسئولینو ته لارښوونه وکړه ترڅو د ننګونو د له منځه وړلو او د پروژو د ګړندي پلي کولو لپاره جدي اقدامات او هلې ځلې وکړي.
