د هرات په ولایت کې ۱۲ زره لینه ډیجیټل ټلیفون دستګاه پرانیستل شوه
د مخابراتو او معلوماتی تکنالوجی وزیر ښاغلی انجنیر امیرزی سنګین په هغه غونډه کې چې د ډیجیټل تلیفون د پرانیستلو به مناسبت جوړه شوې وه ګډون وکړ.
ښاغلي سنګین په دغې غونډه کې چې د هرات والي ښاغلي داود شاه سباه، د ولایتي شورا غړو او د هرات ولایت یو ګن شمیر قومي مشرانو او خلکو حضور درلود، په هیواد کې د مخابراتو د پرمختګ او اهمیت په اړه د خپلې وینا په ترڅ کې وویل: دغه دستګاه ۱۲۰۰۰ تنو ګډون کونکو ته د خدمتونو وړاندې کولو وړتیا لري. ښاغلی سنګین زیاته کړه چې ډیر ژر به ۱۲۰۰۰ کورنیو، هټیوالو او د سودا ګریزو مرکزونو لپاره د دجیټل مخابراتي او انترنیټی خدمتونه او آسانتیاوی برابرې شي. ورپسې د هرات والي دوکتور داود شاه سبا د هغه ولایت د خلکو په استازیتوب د مخابراتو او معلوماتي تکنالوجۍ وزارت د هغو هڅو قدرداني وکړه، چې د مخابراتو په اړوند یې کړي دي.
د یادولو وړ ده چې ښاغلی وزیر د جمهور رییس ۴۵ ګڼې فرمان د پلي کولو او د مخابراتی ستونزو د حل او د یادو خدمتونو د پراختیا په منظور د هرات ولایت کرخ او جبرایَل ولسوالیو ته ولاړ. د سیمې له خلکو او د ولسوالۍ د شورا ګانو له غړیو سره د کتلو تر څنګ یې د یادو ولسوالیو له مخابراتی تاسیساتو څخه لیدنه وکړه. د مخابراتو او معلوماتی تکنالوجۍ ښاغلي وزیر د سفر په بهیر کې د نوري فایبر هغه پروژه چې د شینډنډ ولسوالۍ له هرات ښار سره نښلوی هم پرانیستله.
