د مخابراتو او معلوماتی ټکنالوجۍ وزیر د خپل ازبک سیال سره لیدنه وکړه
جلالتمآب ولسمشر محمد اشرف غني تیره اونۍ د تاشکند په نړیوال کنفرانس کې ګډون وکړ. په یاد کنفرانس کې له جلالتمآب ولسمشر سره د ازبکستان مشرانو د مخابراتي او معلوماتي ټکنالوجۍ په برخه کې د همکارۍ ژمنه وکړه. د کړو ژمنو د کارونو په تعقیب د مخابراتو او معلوماتي ټکنالوجۍ وزیر شهزاد آریوبی په ازبکستان کې د یاد هېواد د مخابراتو او معلوماتي تکنالوجۍ وزیر ښاغلي عظیم احمد خدایوف سره چې د افغان ټیلي کام او ازبک ټیلي کام رییسان هم موجود وو له لاسته راوړنو ډکه ناسته درلوده.
په یاده ناسته کې په دوه اړخیزې همکارۍ، د انټر نیټ بنډویت، نورې فایبر، سیمه ایزې اړیکې، د انټرنیټ انتقال، او د معلوماتي ټکنالوجۍ په برخه کې د زده کړو پراختیا او د دواړو هېوادونو زده کوونکو ترمنځ د پروګرامونو او نظرونو شریکولو او سټراټیژیکې ملګرتیا په اړه بحث او خبرې وکړې.
