د مخابراتو او معلوماتي ټکنالوجۍ وزارت وزیر د ترکمنستان هېواد له سفیر سره لیدنه وکړه
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني کابل کې د ترکمنستان هېواد سفیر ښاغلي خواجه عوضوف سره د نوري فایبر، سایبر سکیورټي او همدا راز د ټکنالوجۍ اړوند موضوعاتو خبرې وکړې.
د مخابراتو او معلوماتي ټکنالوجۍ وزارت وزیر د ترکمنستان هېواد سفیر ته د ښه راغلاست تر څنګ د عشق آباد او کابل اړیکې یې د وروۍ او د دوه ښه ګاونډیانو وګڼلې او زیاته یې کړه چې دواړه هېوادونه د اقتصادي ثبات لپاره چې د سیمې او ګاونډیو هېوادونو لپاره هم حیاتي ارزښت په ګډه کار کوي.
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني اوسني دور کې ټکنالوجي د وخت اړینه اړتیا یاده کړه او زیاته یې کړه چې د ډیټا د انتقال لپاره تر ټولو مهمه برخه د فایبر غځول دي او همدا راز هېوادونه اوس مهال په دې هڅه کې دي چې خپل انټرنټي ماحول د امنیت له پلوده ډاډمن کړي چې مونږ هم په دې برخه کې پوره هڅه کړې د هېواد په کچه د سایبري جرایمو لابراتوار جوړ شوی او هڅه کوو په دې برخه کې نور لازم اقدامات هم ترسره کړو.
د ترکمنستان سفیر ښاغلي خواجه عوضوف هم د مخابراتو او معلوماتي ټکنالوجۍ وزارت څخه مننه وکړه چې اوسمهال دواړه هېوادونه په دې بوخت دي چې د فایبر غځونې او سایبر سیکیورټي په برخه کې په ګډه کار وکړي چې د همدې موخې د تعقیب لپاره وخت وړاندې د مخابراتو او معلوماتي ټکنالوجۍ وزارت استازو یاد هېواد ته سفر درلود او په ځینو مهمو مواردو یې بحث او خبرې کړي او ځینې تفاهم لیکونه یې هم لاسلیک کړي.
