د مخابراتو او معلوماتي ټکنالوجۍ وزارت مشرتابه د نړیوال بانک له مسئولینو سره د ډیجیټل کاسا پروژې کار ګړندي کولو په اړه آنلاین ناسته وکړه
د مخابراتو او معلوماتي ټکنالوجۍ وزارت سرپرستې آغلې معصومه خاوري په نړیوال بانک کې د ډیجیټل کاسا پروژې مشر ښاغلي راجیندرا سینګه او د هغه ملګري پلاوي سره د پروژې د ګړندي کولو او څرنګوالي په اړه خبرې وکړې.
پدې ناسته کې، له تفصیلي خبرو اترو او د نظرونو شریکولو وروسته، د پروژې د کار په پرمختګ ټینګار وشو.
د کاسا ډیجیټل پروژه د مخابراتو او معلوماتي ټکنالوجۍ وزارت یوه خورا مهمه پروژه ده، چې په ۲۰۱۹ کې پیل او تر ۲۰۲۳ زیږدیز کال پورې به دوام وکړي.
د دې پروژې په پلي کیدو سره، د مرکزي آسیا نوري فایبر شبکه به د افغانستان له لارې سهیلي آسیا سره وصل او پراخه شي، او افغانستان به د سیمې د نوري فایبر شبکو په ترانزیټي مرکز بدل شي.
