د مخابراتو او معلوماتي ټکنالوجۍ وزارت سرپرست د MTN شرکت له چارواکو سره وکتل
د مخابراتو او معلوماتي ټکنالوجۍ وزارت سرپرست ښاغلي الحاج مولوی نجیب الله حقانی د MTN شرکت له رئیس ښاغلي عباد رضا او د موسسهیی خدمتونو رئیس ښاغلي هدایت الله زاهد سره ولیدل او یادونه یی وکړه چې د دې غونډې موضوع په M1 کمپنۍ باندې د MTN شرکت د مسوولانه پلور په اړه مخامخ خبرې اترې وې.
پیل کې د MTN شرکت مسوولینو M1 کمپنۍ ته د MTN د ونډو د مسؤولانه لیږد په اړه ډاډ ورکړ او د اسلامي امارت د رییس الوزرا په حضور کې یې د دا ډول غونډې د ترسره کولو غوښتنه وکړه.
د مخابراتو او معلوماتي ټکنالوجۍ وزیر ښاغلي الحاج مولوي نجیب الله حقاني لومړی د هیواد په اقتصادي، ټولنیزو او اداري برخو کې د مثبتو پرمختګونو او د عوایدو د ګراف د لوړوالي په اړه خبرې وکړې او د هیواد اوسني شرایط یې د پانګونې لپاره غوره او مناسب وګڼل.
د مخابراتو وزارت سرپرست د اینټرنټ فریکونسۍ او سپیکټرم د ستونزو په حل کې د همکاریو ژمنه وکړه او یو ځل بیا یې د هېواد له اصولو او نړیوالو معیارونو سره سم M1 ته د MTN شرکت پر مسؤلانه انتقال ټینګار وکړ.
د یادولو وړ ده چې دا غونډه د تیرې غونډې د پریکړې پر بنسټ چې د ۱۴۴۴ کال د شعبان میاشتې په ۲۲ مه نیټه په آنلاین توګه جوړه شوې وه په حضوري ډول تر سره شوه.
