د لوګر ولایت د مخابراتو او معلوماتي ټکنالوجۍ رئیس د ازرې ولسوالۍ له یو شمېر سیمو لیدنه وکړه
د لوګر ولایت د مخابراتو او معلوماتي ټکنالوجۍ رئیس ښاغلي مولوي مطیع الله عابد او د یاد ولایت مرستیال والي الحاج مولوي محمد انور دین پرور ازرې ولسوالۍ کې له مخابراتي آسانتیاو او په یادې سیمه کې د مخابراتي ستونزو له نیږدې لیدنه وکړه.
دغې سفر کې د مخابراتو او معلوماتي ټکنالوجۍ رئیس ښاغلي مولوي مطیع الله عابد څرګنده کړه چې د مخابراتو او معلوماتي ټکنالوجۍ وزارت د هېواد لرو پرتو سیمو ته د مخابراتي خدمتونو د آسانتیاو د رامنځته کېدو په موخه ګڼ شمېر مخابراتي سایټونه پلان کړي چې له مخې به یې یو شمېر ازرې ولسوالۍ کې د مخابراتي ستونزو د حل په موخه هم نصب شي.
د یاد ولایت د مخابراتو او معلوماتي ټکنالوجۍ ریاست د رییس په خبره چې د افغانستان اسلامي امارت له حاکمیت راوروسته د ازرې ولسوالۍ په شمول لوګر ولایت ډیری محرومو سیمو کې ګڼ شمېر مخابراتي سایټونه ګټې اخیستنې ته سپارل شوي او لا هم هڅه روانه ده چې د مخابراتو او معلوماتي ټکنالوجۍ وزارت د لارښوونې او مخابراتي شرکتونو سره په همغږۍ نور سایټونه هم نصب او فعال شي.
ورته مهال د لوګر ولایت مرستیال والي ښاغلي مولوي محمد انور دین پرور د مخابراتو او معلوماتي ټکنالوجۍ وزارت چارې یاد ولایت کې وستایلې او په خبره یې اوس مهال د لوګر ولایت ډېری سیمې له مخابراتي آسانتیاو برخمنې شوي او لا هم په دې برخه کې ګړندي کارونه روان دي.
