د سمنګان ولایت د مخابراتو او معلوماتي ټکنالوجۍ ریاست د کمپیوټر ښوونیز مرکز د ټکنالوجۍ په نویو وسایلوسمبال شو
د مخابراتو او معلوماتي ټکنالوجۍ وزارت د لارښوونې او پلان پر بنسټ د هېواد د ولایتونو د مخابراتو او معلوماتي ټکنالوجۍ ریاستونو د کمپیوټري زده کړو د مرکزونو د سمبالولو د پروسې په دوام، د سمنګان ولایت د مخابراتو ریاست د کمپیوټر ښوونیز مرکز د تکنالوجۍ په نوي او عصري وسایلو تجهیز شو.
په هغه مراسمو کې چې په همدې موخه د سمنګان ولایت د مخابراتو او ټکنالوجۍ په ریاست کې جوړ شوي وو، د مخابراتو او معلوماتي ټکنالوجۍ وزارت د داخلي پلټنې رئیس محترم مولوي محمد طارق فاروقي، د معلوماتي ټکنالوجۍ د څیړنې رئیس محترم الطاف احمد علمیار، د سمنګان ولایت د مخابراتو او معلوماتي ټکنالوجۍ رئیس او کارمنانو، د دولتي بېلابېلو ادارو مسوولینو ګډون کړی و.
د مخابراتو وزارت د معلوماتي ټکنالوجۍ د څیړنې او پراختیا رئیس محترم الطاف احمد علمیار د مخابراتو او معلوماتي ټکنالوجۍ د وزیر صاحب محترم الحاج مولوي نجیب الله حیات حقاني پیغام د مراسمو ګډونوالو ته ولوست.
همدارنګه محترم الطاف احمد علمیار د هیواد له ځوانانو وغوښتل چې د مخابراتو او معلوماتي ټکنالوجۍ وزارت د رهبرۍ له لوري له برابر شوي زرین فرصت څخه په بشپړه توګه ګټه پورته کړي.
دغه راز د مخابراتو او معلوماتي ټکنالوجۍ وزارت د داخلي پلټنې رئیس محترم مولوي محمد طارق فاروقي هم په اوسني عصر کې د معلوماتي ټکنالوجۍ په اهمیت او د ولایتي ښوونیزو مرکزونو د ارزښت په اړه خبرې وکړې او ځوانان یې وهڅول چې له دغو مرکزونو څخه د معلوماتي ټکنالوجۍ په برخه کې د خپلې پوهې د لوړولو لپاره پوره ګټه واخلي.
په دغو وسایلو کې چې د مخابراتو او معلوماتي ټکنالوجۍ وزارت د ټي ډي اف له بودیجې د ۲ میلیونو افغانیو په ارزښت اخیستل شوي دي، لپ ټاپ کمپیوټرونه، دلپ ټاپ کمپوټرلاکر، امنیتي کمرې، د بریښنا لمریز سیستم، میزونه او چوکۍ شامل دي.
د معلوماتي ټکنالوجۍ په برخه کې د وړتیاوو لوړولو په موخه د ولایتي روزنیزو مرکزونو ارزښت او اهمیت ته په کتو سره دمخابراتو او معلوماتي ټکنالوجۍ وزارت مقام په لومړي قدم کې د سمنګان ولایت په ګډون د ۱۶ محرومو ولایتونو کمپیوټر ښوونیز مرکزونه چې د څه باندې ۳۵ میلیونه افغانیو په ارزښت عصري تجهیزات اخیستل شؤي شامل کړي دي.
د یادولو وړ ده چې په دې مراسمو کې د سمنګانو ولايت د مخابراتو او معلوماتي ټکنالوجۍ رياست د کمپیوټر ښوونیز مرکز څخه هغو ١٦ تنو زده کوونکو ته چې د کمپيوټر د اساسي پروګرامونو په برخه کې يې شپږ مياشتنۍ زده کړې یې بشپړې کړي دي، د فراغت سندونه ورکړل شول.
