د الیکترونیکي تذکرو اړوند قرارداد لاسلیک شو
د مخابراتو او مالوماتي ټیکنالوجۍ وزارت او د GTR شرکت تر منځ د الیکترونیکي تذکرو اړوند قرارداد تمدید او لاسلیک شو.
د دغه قرارداد له مخې به د GTR شرکت د الیکترونیکي تذکرو د چاپ، سستمونو، ډېټابېس او الیکترونیکي حکومتولۍ اړوند زېربناوې جوړوي. د الیکترونیکي تذکرې اړوند ۸۰% چارې د همدې شرکت لخوا له مخکې نه تکمیل شوي چې اوس یې قرارداد د راتلونکو دوه کالو لپاره په اصلاح شوې بڼه تمدید شو.
یاد قرارداد د تدارکاتو د ملي کمیسون لخوا منظور شوی، چې په اساس به یې ډېر ژر د الیکترونیکي تذکرو توزیع پیل شي.
د غونډې په پای کې د مخابراتو او مالوماتي ټیکنالوجۍ وزارت سرپرست وزیر انجینر احمد شاه سادات د الیکترونیکي تذکرو د ژر تر ژره توزیع په اړه د ټولو لازمو همکاریو ډاډ ورکړ او د دې قرارداد لاسلیک کېدل یې لویه لاسته راوړنه وبلله.
