د اذربايجان له ولسمشر الهام علي اوف سره ناسته
د مخابراتو او معلوماتي ټيکنالوجۍ سرپرست وزير شهزاد اريوبي د يو لوړپوړي دولتي پلاوي سره اذربايجان ته سفر درلود. په دغه پلاوي کې چې د ماليې وزير ښاغلي اکليل حکيمي يې مشري کوله، نن يې د اذربايجان له ولسمشر ښاغلي الهام علي اوف سره وليدل.
په دغه ناسته کې د اقتصادي او سوداګريزو همکاريو دوه اړخيز تړون چې راتلونکي مياشت به په اذربايجان کې د اسيا زړه (استانبول پروسې) په څنډه کې لاسليک شي، د لاجورد لارې د پنځه اړخيز ټرانزيټي تړون، د افغانستان د کورنيو توليداتو څخه ملاتړ لکه د مرمر کاڼي، زعفران، قالينې او نور زراعتي توکي، د خصوصي سکتور د پياوړتيا، د اذربايجان د سوداګرو د پانګونې جذبول، د اسان خدمت برنامې پراختيا، زېربنا، معارف، تحصيلات، د رېل ليکې، تېل او غازو، د نساجي صنعت او نورو برخو کې په همکاريو خبرې وشوې.
د اذربايجان ولسمشر ښاغلي الهام علي اوف د دوه اړخيزو اړيکو د پراختيا ډاډ ورکړ او افغانستان يې خپل نژدې دوست هېواد وباله.
په پای کې د مرحوم حيدر علی اوف د اذربايجان پخواني ولسمشر او د ۱۹۹۱ ميلادي کال د شهيدانو په يادګارونو د ګلونو ګېډۍ کېښودل شوې.
