د مخابراتي خدمتونو د ټولیز لاسرسي د اتمې پروژې قرارداد لاسلیک شو
په هغه مطبوعاتي کنفرانس کې چې د ۱۳۹۳ کال د ثورمیاشتې په ۳۱ مه نیټه د مخابراتو او معلوماتي ټکنالوجۍ وزارت د کنفرانسونو په تالار کې جوړ شوی وو د ۲۸۹ مخابراتي ټاورونو د نصبولو قرارداد د مخابراتو او معلوماتي ټکنالوجۍ وزارت د اترا ادارې او افغان ټیلی کم، افغان بیسیم او وصل ټیلی کام شرکتونو تر منځ لاسلیک شو.
د مخابراتو او معلوماتي ټکنالوجۍ تخنیکی مرستیال ښاغلي انجنیر بریالی حسام چې په یاد کنفرانس کې ګډون کړی و افغان ټیلیکام، افغان بیسیم او وصل ټیلیکام مخابراتي شرکتونو سره د قرارداد لاسلیک له امله خوښي څرګنده کړه او ویې ویل: د خوښۍ ځای دی چې د مخابراتو او معلوماتي ټکنالوجۍ وزارت په هیواد کې د مخابراتي خدمتونو د لا ودې او پراختیا په لور یو بل ګام اخلي هغه همدا راز د مخابراتو او معلوماتي ټکنالوجۍ رول باارزښته وباله او ویې ویل: مخابرات او معلوماتي ټکنالوجۍ د ژوند په اقتصادي – ټولنیزو، فرهنګې، ښه حکومتولۍ او نورو برخو کې بنسټیز رول لوبوي.
ښاغلي حسام وویل: چې د مخابراتي خدمتونو د تنظیم د قانون پر بنسټ ټول مخابراتي شرکتونه مکلف دي چې د خپل خالصو عوایدو څخه ۲.۵ سلنه په ربعوار ډول د مخابراتو د پراختیا صندوق کې جمع کړي.
ښاغلي حسام زیاته کړه: چې د هیواد په کلیوالو او لرو پرتو سیمو کې د ټولیز لاسرسي د خدمتونو د پراختیایي پالیسي پر بنسټ د ټولیز لاسرسي اتمه پروژه چې د افغانستان د ۳۴ ولایتونو په ۲۱۳ ولسوالیو کې د ۲۸۹ ټاورونو BTSs لګوي په کار واچوله د داوطلبۍ له اعلان څخه وروسته په نوموړي پروژه کې لاندني شرکتونه ګټونکي اعلان شول:
- افغان ټیلیکام (۱۹۲) سایتونه
- افغان بیسیم (۸۵) سایټونه
- وصل ټیلیکام (۱۲) سایټونه
ښاغلي حسام وویل: چې اوس د ټولیز لاسرسي د اتمې پروژې د داوطلبي ټولې قانوني مرحلې مکملې شوي چې د هغه پر بنسټ قراردادونه له پورته ذکر شویو شرکتونو سره لاسلیک کیږي. دغه پروژې به د هیواد په هغو سیمو کې تطبیقیږی په کومو کې چې مخابراتې خدمتونه نشته او که شته هم په ټیټه کچه دي. د دغې پروژې په پلي کیدو سره به د نوموړو سیمو ۵۷۸۰۰۰ اوسیدونکو مخابراتي اړتیاوې پوره کړي.
