د می ۱۷ د مخابراتو او معلوماتي ټولنې نړیواله ورځ د مخابراتو وزارت لخوا ولمانځل شوه

د مې ۱۷مه د مخابراتو نړیواله ورځ هر کال دمخابراتي او معلوماتي ټولنې یا (ITU) غړو هېوادو له خوا په ټوله نړۍ کې لمانځل کیږي. دغه ورځ (د می میاشت  اوولسم)  سږ کال بروډبانډ د تل پاتي پرمختګ  لپاره د شعار لاندي  په ټوله نړۍ کې ولمانځل شوه ، چې د مخابراتي او انټرنیټي چټکو خدمتونو په پرمختګ کې یو اړین ګام شمیرل کیږي. 

د مې ۱۷ د مخابراتو او معلوماتي ټولنې نړیواله ورځ  د روان ۱۳۹۳ کال د ثور میشتې په ۱۸ نیټه د یو لړ ځانګړو مراسمو په ترڅ کې د مخابراتو او معلوماتي ټکنالوجۍ وزیر ښاغلي امیرزی سنګین، رهبري پلاوي، د کابینې غړو ، د پارلمان غړو، مخابراتی شرکتونو او رسنیو استازو په ګډون په انتر کانټینینټال هوټل کې ولمانځل شوه.
لومړی د مخابراتو او معلوماتي ټکنالوجۍ وزیر ښاغلي امیرزی سنګین  میلمنو ته د مخابراتو او معلوماتی ټولنې نړیواله ورځ په مناسبت مبارکي وویل او د مخابراتو او معلوماتي ټکنالوجۍ د نړیوالې ورځې د اهمیت په په اړه یې داسې وویل: اړیکې د ژوند په ټولو برخو لکه اقتصادی، تجارتي، پوهنې، لوړو زده کړو او نورو برخو کې ډیرې مهمې دي .

ښاغلي سنګین وویل: چې د مخابراتو او معلوماتي ټکنالوجۍ وزارت د هیواد د مخابراتي سکتور لپاره  یوه جامع او اړینه  پالیسی طرحه او پرلار اچولي ده.  دیادې پالیسي عمده موخه او هدف  د خصوصي پانګونې پرمټ هیوادوالو ته  د  ښو، باکیفیته او چټکو مخابراتي او انټرنیټي خدمتونو په مناسبه بیه عرضه کول دي، دمخابراتو او معلوماتي ټکنالوجۍ وزارت سالمه رهبري، د کارمندانو  نه ستړي کیدونکې هلې ځلې او ذکرشوي پالیسي ددې باعث  شوه چې په ډیر کم وخت کې نه یواځي د هیوادوالو د مخابراتو او معلوماتي ټکنالوجۍ اړوند اساسي ستونزي حل شوي بلکه د هیوادوالو د ژوند سطح له اقتصادي او اجتماعي پلوه ډیره اوچته او معیاري شويده، چي یاده لاسته راوړنه د هیواد په تاریخ کې بي ساری ده.

د افغانستان د مخابراتو وزیر زیاته کړه: د مخابراتي ټکنالوژۍ څلورم نسل/4G به ډېر ژر په افغانستان کې دود شي او خلک به د راتلوونکو څو کلونو په ترڅ کې په دې وتوانیږي چې د گرځنده ټیلیفونونو له لارې په ټاکنو کې خپلې رايې وکاروي.

ښاغلي سنګین زیاته کړه:  چې افغانستان په تیرو څه د پاسه ۱۰کلونو کې د مخابراتو په ډگر کې د پام وړ پرمختگ کړى او اوسمهال په سلو کې ٩٠ افغانان له مخابراتي خدمتونو برخمن دي، او په ميليونونو نور گرځنده ټیلیفونونو او انټرنیټ ته لاسرسى لري د مخابراتو او معلوماتي ټکنالوجۍ وزارت په تیره یوه لسیزه کې  برسیره پر یاده پالیسي د تلیفون پنځه خصوصي شرکتونو ته د 3G جوازونه، یو د CDMA جواز او56  د انټرنیټي خدمتونو د عرضه کولو جوازونه  ورکړیدي چي له دي جملي څخه 3 شرکتونه د WIMAX خدمتونه عرضه کوي، همدارنګه د زیربنائی پروژو د پرمختګ لپاره مهم فعالیتونه لکه د مزي لرونکي تلیفون،  DSL ،  مایکروویف، سټلایټ او د نوري فایبر ملی شبکه د هیواد د لویو لارو په اوږدو کې بشپړشویده چي د لویو ولایتونو له مرکزونو څخه تیریږي او افغانستان یی له ګاونډیو هیوادونو سره وصل کړیدی اوعملاً فعالیت کوي، همدا راز د یوې لسیزې په موده کې یولړ نور مهم ملی خدمتونو په برخه کې چې د افغان ست ۱مخابراتی سپوږمکۍ ځای پرځای کول، د ډیجیټل ټلویزیوني خپرونو سیستم او الکټرونیکي پیژند پاڼو جوړولو او ښاري ادرس سیستم څخه عبارت دي په بریالیتوب سره تر سره کړی.

نوموړی وویل : چې د مخابراتو او معلوماتي ټکنالوجۍ وزارت کلني عواید له ۲۰۰ میلیون ډالر اوړي، تر اوسمهاله مونږ  ۱۳۰۰۰۳۴۰۰۰ ډالر عواید د دولت خزانې ته سپارلي دي.

د مخابراتو په سکتور کې ۲.۲ ملیون ډالر پانګونه شویده چې له نیکه مرغه په یاد سکتور کي يي د سالم رقابت زمینه برابره کړیده او ۱۴۰۰۰۰ هیوادوالو ته کار زمینه برابره شویده.  دم ګړۍ په هیواد ۸۹ ټلویزیوني چینلونه او ۲۲۰ راډیویي خپرونو شبکې په فعالیت بوختې دي. 

وروسته د نړیوالې مخابراتي اتحادیې (ITU) د سکرتر جنرال پیغام د کنفرانس ګډونوالو ته وړاندې کړای شو.

وروسته د ولسی جرګی غړی صاحب خان د خلکو په ورځنی چاروکې د معلوماتی تکنالوجۍ د ارزښت په هکله خبرې وکړی او د خصوصی مخابراتي شرکتونو څخه یې په ټینګار سره غوښتنه وکړه بیو کې د خلکو اقتصادی وضعیت ته هم پاملرنه وکړي او د مخابراتو په سکتور کې د کادرونو په روزنه کې هڅه وکړي.

همداراز د سوداګری خونې رییس ښاغلي حقجو وویل: چې د مخابراتو وزارت د لاسته راوړنو راز د مارکیټ تقاضا او  په مخابراتو او معلوماتی ټکنالوجۍ  وزارت کې د شفافې پالیسي شتون او اداري فساد پروړاندې مبارزه ده.

ورپسې  د اطلاعاتو او فرهنګ وزات معین ښاغلی غلام نبی فراهی د خپل وینا په ترڅ کې دمخابراتو او معلوماتی تکنالوجۍ وزارت د لاسته راوړنو څخه قدردانی څرګند کړ او د مخابراتو او معلوماتی ټکنالوجۍ نړیوال ورځ یی د مخابراتو او فرهنګ وزارتونو ګډ ورځ وبلله. ښاغلی فراهی زیاته کړه چی د انحرافاتو څخه باید په کلکه ډډه وشی او ښایی د رسنیو محتوا د اغیزمنولو لپاره هڅه وکړو.

 د افغان تیلی کام رییس ښاغلی انجنیر ګل احمد راستمن او د افغان بیسیم شرکت استازی پخپلو خبرو کې دمۍ  ۱۷ نیټې لمانځنه او د ۲۰۱۴ کال موضوع یی با ارزښته وبلل. هغوی  هم زیاته کړه چې خلکو ته د مخابراتی او انټرنیټی خدمتونو وړاندی کول د افتخار وړ بولی.