کابل کې د لومړي ځل لپاره په امتحاني ډول ۵جی خدمات پیل شوي
د مخابراتو او معلوماتي ټکنالوژۍ وزارت وزیر ښاغلي الحاج مولوي حمدالله نعماني افغان بیسیم مخابراتي شرکت رئیس ښاغلي علي الله سروري سره لیدنه کې د مخابراتي پوښښ په پراختیا، لرو پرتو سیمو ته د مخابراتي آسانتیاو برابرولو او د کیفیت پر ښه والي یې خبرې کړي.
په دغې ناسته کې د افغان بیسیم مخابراتي شرکت رئیس ښاغلي علي الله سروري د خپل شرکت د لاسته راوړنو او فعالیتونو ګزارش د مخابراتو او معلوماتي ټکنالوژۍ وزیر سره شریک کړ او یادونه یې وکړه چې دوی اوس د غوره خدمتونو د وړاندې کولو په موخه په پلازمینې کابل کې په امتحاني ډول د ۷۴ آنټنونو ظرفیت ۵جی ته لوړ کړی چې د زیربنا له چمتو کولو او له امتحاني دورې وروسته به یې د هېواد په نورو برخو کې هم تطبیق کړي.
ورته مهال د یاد شرکت مسؤلینو یادونه وکړه چې د هېواد شمال او جنوب شرق ولایتونو ته د مخابراتو او معلوماتي ټکنالوژۍ پخواني وزیر صاحب د سفر پر مهال د منظور شویو آنټنونو له ډلې د ۸ سایټونو چارې بشپړې شوي یو سایټ د بشپړېدو په حال کې دی او د دوه سایټونو رغنیزې چارې روانې دي چې لنډه موده کې به یاد ۳ آنټنونه هم ګټې اخیستنې ته وسپارل شي او همدا راز د مخابراتي خدمتونو د تنظیم ادارې د ټي ډي اېف ۸ نورو سایټونو منظوري هم وړاندې شوې چې د اترا ادارې له لوري په ټاکل شوي نېټه به یې چارې هم بشپړې شي.
د ښاغلي علي الله سروري په وینا شرکت یې د ۲۰۲۶م کال له پیل راهیسې ۴۶ سایټونه د خپلې انکشافي بودیجې له مخې جوړ او ګټې اخیستنې ته سپارلي او همدا راز ۱۸۶ نور یې تر کار لاندې دي.
د افغان بیسیم مخابراتي شرکت مسؤلینو د مخابراتو او معلوماتي ټکنالوژۍ وزارت له وزیر او رهبرۍ څخه هم مننه وکړه چې د چارو په آسانتیا او مخابراتي خدمتونو د وړاندې کولو په برخه کې یې تل همکاري او لاسنیوی کړی.
د یادونې وړ ده دغې ناسته کې د مخابراتو او معلوماتي ټکنالوژۍ وزارت وزیر ښاغلي الحاج مولوي حمدالله نعماني اوسني عصر کې د اړیکو او ارتباطاتو تر ټولو مهمه او اساسي برخه مخابرات یاد کړل او ټینګار یې وکړ چې د مخابراتي سکټور د لا ښه والي او ودې په موخه له مخابراتي شرکتونو سره په ګډه خپلو هلو ځلو ته دوام ورکوي او هڅه کوي څو هېواد کې د پرمختللې ټکنالوژۍ په استفادې هېوادوالو ته با کیفیته خدمات وړاندې شي، او ټینګار یې وکړ چې په ټولو قانوني برخو کې له مخابراتي شرکتونو سره خپلو همکاریو ته دوام ورکوي.
