د مخابراتو او معلوماتي ټکنالوجۍ وزارت د لوړو زده کړو وزارت ترمنځ د ډیجیټل کتابتون د جوړولو هوکړه لیک لاسلیک شو

د راوان 1396 کال د مرغومی د میاشتې په 26 مه نیټه د مخابراتو او معلوماتي ټکنالوجۍ وزرات د لوړو زده کړو وزارت سره د ډېجېټل کتابتون د جوړیدو هوکړه لیک لاسلیک کړ
ددغه هوکړه لیک له مخې د مخابراتو او معلوماتي ټکنالوجۍ وزارت له لوري د لوړو زده کړو وزارت له پاره ډېجېټل کتابتون جوړیږي چې د لس میلیونه کتابونو د ځایدو وړتیا به ولري او چارې به يې په روانو څلورو میاشتو کې بشپړې شي.
پدغه کتابتون کې به بیلابیل علمي اثار او کتابونه، تحصلي مقالې او اکاډمیک مواد په ډيجټل شکل ځای پر ځای کيږي او خلک به وکولی شي له دغه کتابتون څخه د هېواد د ننه او د باندې په انلاين ډول ګټه پورته کړي او د اړتیا وړ مواد ترلاسه کړي.
د یاد ډېجېټل مرکز چارې تر دوو کلونو پوري مخابراتو او معلوماتي ټکنالوجۍ وزارت سمبالوي، او ترڅنګ يې ددغه سیستم د فعال ساتلو له پاره د لوړو زده کړو وزارت د مسلکي کسانو د روزلو دنده هم پر غاړه لري او له هغې وروسته به لوړو زده کړو وزارت ته سپارل کیږي.