د نوري فایبر غزولو او مواصلاتي زیربناو پرساتنې ټینګار، د مخابراتو او معلوماتي ټکنالوجۍ، ټولګټو وزارتونو او اترا ادارې د مشرتابه غونډه
دا ناسته د مخابراتو او معلوماتي ټکنالوجۍ وزیرې معصومې خاوري، د ټولګټو وزیر نجیب الله یمین، د دغه وزارت د ساتنې او پاملرنې مرستیال پاینده انوري او د اترا ادارې رئیس عمر منصور انصاري په حضور جوړه شوې وه او د درې واړو ادارو مشرانو په اړوندو مسایلو، د هیواد د ترانسپورتي زیربناو او د لویو لارو په کارولو سره د نوري فایبرد لاین غزولو څرنګوالي په اړه خبرې وکړې.
د مخابراتو وزیرې د نوري فایبر شبکې سره د ۲۵ ولایتونو د اتصال او د پاتې ولایتونو نښلولو ته په اشارې، د اړوندو ادارو ترمنځ د همکارۍ غوښتنه وکړه.
د ټولګټو وزارت وزیر نجیب الله یمین په دې برخه کې د لازمې همکارۍ په څرګندولو سره ټینګار وکړ چې دې هدف ته د رسیدو په خوا کې، باید د سړکونو او لویو لارو چې ملي شتمني ده د ساتنې په اړه لازم معیارونه په پام کې ونیول شي.
د دې پروسې د اړوند چارو د ښه تنظیم او د هرې ادارې دندو او مسؤلیتونو مشخص کولو لپاره، دا درې ادارې به یو هوکړه لیک هم لاسلیک کړي.
