د مخابراتو او معلوماتي ټکنالوجۍ وزارت مشرتابه سره د هیواد د روغتیا سیستم ډیجیټل کولو پلان شریکول
نن مازدیګر د عامې روغتیا وزارت سرپرست ډاکټر وحید مجروح او د دې وزارت یو شمیر چارواکو د مخابراتو او معلوماتي ټکنالوجۍ له وزیرې معصومه خاوري سره د هیواد د روغتیا سیسټم د ډیجیټل کولو پلان د شریکولو په موخه وکتل او د پروژې په اړه یې خبرې وکړي.
پدې ناسته کې د عامې روغتیا وزیر د مخابراتو او معلوماتي ټکنالوجۍ وزارت مشرتابه ته د هیواد د روغتیا سیستم ډیجیټل کولو پلان تشریح کړ.
تمه کیږي چې دا پلان به د رو ڼتیا په لور عمومي بدلون رامینځته کړي، د روغتیا سیسټم ټولو برخو کې یوشان معلومات راټول او په هیواد کې د باکیفیته خدمتونو لپاره لاره هواره کړي. نوموړي د پلان تخنیکي برخو د ارزونې او پلي کیدو په برخه کې د مخابراتو او معلوماتي ټکنالوجۍ له وزارت څخه د همکارۍ غوښتنه هم وکړه.
د مخابراتو او معلوماتي ټکنالوجۍ وزیرې د هیواد د روغتیایي سیستم ډیجیټل کول یوه مهمه اړتیا وګنله او د عامې روغتیا وزارت د ډیجیټل کولو د پلان هرکلی وکړ.
آغلي معصومه خاوري همدا راز زیاته کړه چې د هیواد د روغتیا سیستم ډیجیټل کولو پلان له مطالعې وروسته به د روغتیا وزارت تخنیکي همکارانو سره د پلان د بډاینې لپاره خپل نظریات او وړاندیزونه شریک کړي او د مخابراتو او معلوماتي ټکنالوجۍ وزارت به د دې پروژې په پلي کولو کې د روغتیا سکتور سره تخنیکي همکاري وکړي.
