د دولتي دفترونو بریښنایي کولو په لور عملي ګامونه
د معاملاتو او الکترونیکي لاسلیک قانون تصویب کیدو وروسته، اوس مهال د دولتي دفترونو د govnet (د دولتی اداراتو داخلي او خوندي شبکې) له لارې بریښنایی کیدو او اتصال لپاره لاره هواره شوې ده.
داخلي بریښنالیک سیسټم تر نوم لاندې د ډومین af.، د معلوماتو مرکز او govnet شبکه هغه درې فاکټورونه دي چې انټرنیټ او انټرانیټ سره د دولتي دفترونو نښلولو امکانات برابروي.
دې موخي ترلاسه کولو لپاره پرون ماسپښین د وږي میاشتې په 22 نیټه د مخابراتو او معلوماتي ټکنالوجې وزیر ښاغلي محمد فهیم هاشمي په مشرۍ او د وزارت د پالیسی او پروګرام مرستیال ښاغلي لطیف رای، ډیجیټل کاسا رییس او د دغې پروژې متخصصینو په حضور ناسته جوړه شوې وه او د دغه پروګرام د پلي کولو څرنګوالي، لازمې اسانتیاوې او تجهیزاتو چمتو کولو او متوقعه پایلو په اړه تفصیلي او هراړخیزې خبرې وشوې.
پدې ناسته کې، د ډیجیټل کاسا رئیس ته لارښوونه وشوه چې هغه دولتي دفترونو لپاره چې ټاکل شویده د دې پروژې له لارې له انټرنیټ سره وصل شي د لومړیتوب چوکاټ او مهال ویش چمتو کړي او د govnet شبکې تجهیزاتو مشخصات او اټکل شوي نرخ په اړه اړین تخنیکي معلومات چمتو او په راتلونکې ناسته کې وړاندې کړي.
همداراز پدې ناسته کې، د وزارت د معلوماتو مرکز د کاري ظرفیت او خوندیتوب د زیاتوالي څرنګوالي په اړه هم بحث وشو ترڅو اړین تجهیزات او وسایل د تدارکاتو پروسې له لارې تعقیب شي.
