د روشن مخابراتي شرکت د ده افغانانو نمايندګي وتړل شوه
پنجشنبه ۱۳۹۸/۱/۸ - ۱۵:۷
د مخابراتو او معلوماتي ټکنالوجۍ وزیر محترم شهزاد آريوبي نن په کابل کې د غېر راجستر شويو سيمکارتونو د ټولولو کمپاين پيل کړ او د بېلابېلو شرکتونو زرګونه غېر راجستر سيمکارتونو ټولولو تر څنګ يې د غېر راجستر سيمکارتونو د بالفعل خرڅلاو له کبله په ده افغانانو کې د روشن مخابراتي شرکت نمايندګي مهرو لاک کړه.
محترم شهزاد آريوبی ددې تر څنګ د MTN، اتصالات او افغان بېسیم شرکتونو نمایندګيو ته جدي سپارښتنه وکړه چې د غېر راجستر سيمکارتونو د خرڅلاو څخه ډډه وکړي.
د مخابراتو او معلوماتي ټکنالوجۍ وزارت د رسمي مکتوبونو له لارې په قاطعيت سره يادونه کړې وه چې له دې وروسته د مخابراتو او معلوماتي ټکنالوجۍ وزارت ته په هېڅ صورت په غېرمجوز توګه د سيمکارتونو پلور د منلو وړ نه دی.
شرکتونه بايد د مخابراتو او معلوماتي ټکنالوجۍ وزارت او اترا ادارې له خوا د جوړې شوې کړنلارې له مخې سيمکارتونه توزيع کړي او د تخلف په صورت کې به له توصيې او جرېمې وروسته د سيمکارت پلورنې د اړوند شرکت د جواز لايسنس لغوه کېږي.
د مخابراتو او معلوماتي ټکنالوجۍ وزیر د لسګونه سيمکارت پلورونکو څخه د سيمکارتونو ټولونې تر څنګ هغوی ته توصيه وکړه چې په راتلونکي کې په غېر مجوز توګه سيمکارتونه ونه پلوري او د خپلو خلکو او هېوادوالو د ژوندانه د مصؤونيت په برخه کې ونډه ادا کړي.
مخابراتو او معلوماتي ټکنالوجۍ وزات ددې تر څنګ په ټولو ولايتونو کې د مخابراتو او معلوماتي ټکنالوجۍ ریاستونو ته هدايت ورکړی چې د اترا ادارې ولايتي مسؤولينو د امنيتي نهادونو په همکارۍ ټول غېر مجوز سيمکارتونه راټول کړي او که د وزارت هر کارکوونکی په دې برخه کې غفلت وکړي له دندې به لرې کړل شي.
د مخابراتو او معلوماتي ټکنالوجۍ ولايتي رياستونه مکلف دي چې د د اړوندو مواردو د موجوديت په صورت کې د اړوند شرکت د فروشاتو ياده نمايندګي د اترا ادارې او امنيتي نهادونو په همکارۍ مهرو لاک کړي.
د يادولو وړ ده چې د غير راجستر سيمکارتونو د پلورونکو د بانډ په شکل کار کوي چې د کمپاين د پېل سره يې له ډېرو سيمو سيمکارتونه ټول کړي، خو د مخابراتو او معلوماتي ټکنالوجۍ وزارت هوډ لري چې نور ددغه پدېدې پر وړاندې کلکه مبارزه وکړي او د خلکو د ژوند او هوساينې په موخه د غېر راجستر سيمکارتونو د خرڅلاو مخه ونيسي.
