د موباییل له لارې ددولتي کارمندانو معاش د ورکړې پروسه پراختیا ومونده!
سهشنبه ۱۳۹۷/۷/۱۷ - ۱۵:۲۵
نیټه: د تلې ۱۷ مه، ۱۳۹۷
د موباییل له لارې ددولتي کارمندانو معاش د ورکړی پروسې د پراخوالي په موخه د حکومت د اطلاعاتو او رسنیو په مرکز کې د مخابراتو او معلوماتي ټکنالوجۍ وزیر ښاغلي شهزاد اریوبي د پوهنې وزارت، افغان بیسیم او روشن له مخابراتي شرکتونو سره جلا جلا هوکړه لیکونه لاسلیک کړل.
په دې اړه په جوړو شوو مراسمو کې د مخابراتو وزیر ښاغلي اریوبي وویل چې د موباییل له لارې د معاشاتو ورکړه ( MSP ) په افغانستان کې د معاشاتود الیکترونیکي ورکړی په پروسه کې مهمه ونډه لري.
ده زیاته کړه حکومت د ژمنو سره سم هڅه کوي چې د معاشاتو په ورکړه کې له ډیجیټلي وسایلو څخه په استفادې پراخ شفافیت رامینځته کړي او د پوهنې وزارت په همکارۍ دې پروسې ته لا وده ورکړي.
د ښاغلي اریوبي په وینا ددغه هوکړه لیکونو په لاسلیک سره به ښوونکي وکولی شي چې د هېواد په لرو پرتو سیمو کې چېرته چې بانکونه شتون نه لري په اسانی سره په خپل وخت بغیر له کوم ځنډ معاشونه ترلاسه کړي.
