ډېر ژر به هېواد کې د ټولو مخابراتي شبکو د سيم کارتونو راجسترېشن پيل شي.
د مخابراتو او مالوماتي ټيکنالوژۍ سرپرست وزير سيد احمدشاه سادات دغه خبرې نن ننګرهار ولايت ته د خپل سفر په مهال وکړې. هغه د مخابراتو او مالوماتي ټيکنالوژۍ د رياست تر څنګ د افغان ټيلي کام د ختيځ زون مرکز څخه هم ليدنه وکړه او د انټرنيت د سرعت تر څنګ مختلفې تخنيکي څانګې يې و ارزولې. د ننګرهار خلکو په دغه ولايت کې د انټرنيټي خدماتو او په وروستيو کې د دغه وزارت د سرپرست وزير له لوري د سلام مخابراتي شرکت د انټرنيټ له ۲۰٪ تخفيف څخه مننه وکړه. د سلام مخابراتي شرکت د تخفيف سره سم په دغه ولايت کې د "سلام" سيم کارت پلور زيات شوی او هره ورځ په سلګونو مراجعين ولايتې څانګې ته ورځي.
انجينر سيد احمد شاه سادات همدا راز د ننګرهار د والي او خلکو د هغې غوښتنې په ځواب کې چې په دغه ولايت کې د هدفي وژنو، اختطاف، تهديدونو او نورو جرايمو د مخنيوي لپاره د سيم کارتونو د راجسترېشن پروسه پيل کړي، وويل چې په ټول هېواد کې د سيم کارتونو د راجسترېشن لپاره يو طرز العمل نهايي شوی چې ډېر ژر به ېې عملي پروسه پيل شي.
