هېواد کې د مخابراتي ستونزو د حل لپاره هڅې
پنجشنبه ۱۳۹۸/۳/۹ - ۱۵:۳۸
د مخابراتو او معلوماتي ټکنالوجۍ سرپرست محترم محمد فهيم هاشمي نن د يو شمېر شرکتونو او د مخابراتي خدماتو د تنظیم ادارې (اترا) د مسؤولينو سره جوړوونکي ناسته درلوده.
د مخابراتو او معلوماتي ټکنالوجۍ سرپرست وزیر په دې برخه کې د خصوصي سکټور د پانګونې مننه وکړه او خصوصي شرکتونه يې غوره خدماتو او لا نورې پانګونې ته وهڅول.
په دې ناسته کې د مخابراتي خدماتو د بهبود، غږ د کېفيت، د قيمتونو د کمښت او همدا راز د مخابراتي خدماتو د کنټرول په اړه هر اړخيزه خبرې وشوې.
د مخابراتي شرکتونو او اترا ادارې مسؤولینو د همکارۍ د ژمنې تر څنګ، د پېرودونکو د خدماتو د بهترۍ، مخابراتي خدماتو کيفيت او همدا راز د خدماتو د تنظیم په اړه لازم معلومات شریک کړل.
د مخابراتو او معلوماتي ټکنالوجۍ وزارت په پام کې لري چې راتلونکې اونۍ د ټولو شرکتونو او اړوندو مسؤولينو سره ګډه ناسته ولري، تر څو د مخابراتي ستونزو د حل په برخه کې جدي ګامونه واخیستل شي.
