هرات کې له ایرانه بیرته راستنېدونکو افغان کډوالو لپاره مخابراتي چوپړ چمتو شو
د هرات ولایت اسلام کلا پنډغالي کې له ایران هېواد څخه افغانستان ته د هېوادوالو د بیرته راګرځېدو په موخه د ۵ مخابراتي شبکو استازولۍ فعالې او د مخابراتي چوپړ په موخه یې په فعالیت پیل وکړ.
په دغو استازولیو کې مهاجرینو ته په وړیا ډول سیمکارټ ورکول کېږي چې د وړیا دقیقو سربیره وړیا انټرنټ هم لري.
دا آسانتیاوې د مخابراتو او معلوماتي ټکنالوجۍ وزارت د مخابراتي خدمتونو د تنظیم ادارې (اټرا) له لوري بیرته راستنېدونکو هېوادوالو ته د مخابراتي ستونزو د حل او له مخابراتي آسانیتاو د ګټې اخیستنې په موخه چمتو شوي څو وکولای شي پر وخت خپلې مخابراتي ستونزې حل او په آسانه ډول د ۵ مخابراتي شبکو سیمکارټونه ترلاسه کړي.
د یادونې وړ ده اوس مهال یاد سیمکارټونه په استثنايي ډول د مهاجرت په اسنادو ویشل کېږي چې ۴ میاشتې به فعاله وي تر هغې وروسته د سیمکارټ درلودونکی اړ دی څو خپل سیمکارټ د اټرا د طرزالعمل مطابق ثبت او راجسټر کړي چې د نه راجسټر کېدو په صورت کې به غیر فعاله کېږي.
هرات ولایت کې د مخابراتو او معلوماتي ټکنالوجۍ ریاست وخت په وخت د اسلام کلا پنډغالي کې د مخابراتي شرکتونو د استازولیو او خدماتو څارنه کوي او هڅه کوي څو د بیرته راستنېدونکو افغانانو لپاره د مکالمې او انټرنټ په برخه کې شته ستونزې حل او غوره آسانتیاوې برابرې کړي.
