د مخابراتو سرپرست وزیر محمد فهیم هاشمي، نن سه شنبه د وږي میاشتې پنځمه نېټه د یوه پلاوې په مشرۍ هرات ولایت ته ورسېد.
ښاغلي هاشمي د دغه سفر په ترڅ کې د هرات له والي قیوم رحیمي سره د لیدنې تر څنګ، په دغه ولایت کې پر مخابراتي سکټور د پانګونې پر موضوع ټینګار وکړ، چې په وینا یې د هرات خلګ او پانګوال په دې برخه کې مهم رول لوبولای شي.
د نوموړي په وینا، په هرات ولایت کې پر ټکنالوجۍ پانګونه مرسته کوي، څو هیوادوالو ته د پرمختګ او کار زمینه څو چنده زیاته کړي.
د مخابراتو او معلوماتي ټکنالوجۍ سرپرست وزیر وویل، د دغه وزارت تازه تګلارې به د هرات ولایت او ټول هیواد په کچه د تېز انټرنیټ او کمو بیوو زمینې زیاتې کړي.
ښاغلي هاشمي ټینګار وکړ، په ولایاتو کې د خصوصي مخابراتي سایټونو امنیت ساتنه د ولایتي ادارې مسوولیت دی، چې باید زیاته پاملرنه ورته وشي.
د هرات والي هم د مخابراتو سرپرست وزیر ته د ښه راغلاست تر څنګ، په مخابراتي او فن اوري برخه کې د پرمختګ هر راز ملاتړ او دغه ولایت کې مخابراتي سایټونو د خوندیتابه ډاډ ورکړ.