د مخابراتو وزارت مشرتابه د ډیجیټل کاسا پروژې د کار ګړندي کولو په موخه د نړیوال بانک له چارواکو سره آنلاین ناسته وکړه
د مخابراتو او معلوماتي ټکنالوجۍ وزیرې، محترمې معصومه خاوري د ډیجیټل کاسا پروژې رییس ښاغلي راجندرا سنګ او په نړیوال بانک کې د هغه ملګرو سره د ویډیو کنفرانس له لارې د ننګونو له منځه وړلو او د پروژې کار د ګړندۍ کولو په اړه خبرې وکړي.
پدې ویډیو کنفرانس کې، د نړیوال بانک چارواکو د نظرونو اوریدو وروسته، آغلې خاوري یادونه وکړه چې ډیجیټل کاسا د افغانستان لپاره یو له حیاتي او مهمو پروژو څخه دی او د مخابراتو وزارت رهبري په ډیر جديت کار کوي ترڅو دا پروژه په خپل وخت بشپړه شي.
ډیجیټل کاسا پروژه په ۲۰۱۹ زیږدیز کال کې پیل شوې او تر ۲۰۲۳ پورې به بشپړه شي. د دې پروژې په بشپړیدو او پلي کیدو سره به د مرکزي آسیا نوري فایبر شبکه د افغانستان له لارې سویلي آسیا سره ونښلول شي او افغانستان به د سیمې د نوري فایبر شبکې لپاره د ترانزیت په یو مهم مرکز بدل شي.
