د مخابراتو او معلوماتي ټکنالوجۍ وزیرې د عامې روغتیا وزارت سرپرست سره وکتل
د مخابراتو او معلوماتي ټکنالوجۍ وزیرې معصومې خاوري د عامې روغتیا وزارت سرپرست وزیر ښاغلي وحید مجروح سره ولیدل او دواړه خواوې د روغتیایي سیستم د ډیجیټل کولو په اړه خبرې وکړې.
په دې لیدنه کې د مخابراتو او معلوماتي ټکنالوجۍ وزیرې معصومه خاوري، د عامې روغتیا وزارت روغتیایي پروسو او سیسټمونو ډیجیټل کول اړین وبلل او په دې برخه کې یې د هر ډول تخنیکي همکاریو چمتوالی وښود.
په دې کتنه کې د عامې روغتیا سرپرست وزیر ډاکټر وحید مجروح په خپلو خبرو کې وویل چې "موږ د روغتیا سکتور د ډیجیټلي کولو لپاره یوه هراړخیزه طرحه چمتو کړې ده، چې د ادارو او ذیدخلو خواوو سره مو شریکه کړې ده.
پدې اړه، د مخابراتو وزیرې وویل چې د پلان نهایی کولو لپاره باید یو ګډ تخنیکي ټیم رامینځته شي ترڅو د نهایی کیدو لپاره یې په ګډه کار وکړي. تمه کیږي چې د دې طرحې په پلي کېدو سره به د روڼتیا، حساب ورکونې، پر وخت او یوشان معلوماتو راغونډولو او روغتیایي خدمتونو وړاندې کولو د کیفیت لوړولو په برخو کې ټولیز بدلون راشي.
