د لوګر ولایت مرکز پل علم کې د اټوما مخابراتي شرکت ۴ مخابراتي سایټونو فورجي ته ارتقاء وکړه
د مخابراتي خدمتونو د کیفیت د لوړولو په موخه د هېواد په ټولو برخو کې د مخابراتي شرکتونو د سایټونو د ارتقاء چارې روانې دي چې له مخې به یې د مخابراتي شرکتونو کیفیت کې ښه والی راشي د همدې لړۍ په دوام د لوګر ولایت مرکز کې د اټوما مخابراتي شرکت د ۴ مخابراتي سایټونو ظرفیت ۴ جي ته لوړ کړای شو.
په همدې موخه جوړې شوې غونډه کې چې د لوګر ولایت مرستیال والي ښاغلي الحاج مولوي محمد انور دین پرور، د مخابراتو او معلوماتي ټکنالوجۍ وزارت د عامه اړیکو رییس او ویاند، د لوګر ولایت د مخابراتو او معلوماتي ټکنالوجۍ رییس ښاغلي مولوي مطیع الله عابد، اټرا ادارې استازي او د اټوما مخابراتي شرکت مسؤلینو ګډون درلود.
دغې غونډه کې د لوګر ولایت مرستیال والي ښاغلي الحاج مولوي محمد انور دین پرور د خپلو څرګندونو په ترڅ کې یادونه وکړه چې اوس مهال د ډاډمن امنیت له مخې د زیربناو په ایجاد او رغونې برخو کې د پام وړ پرمختګ شوی او له مخابراتي شرکتونو یې مننه وکړه چې د لوګر ګڼ شمېر سیمو ته یې خپل خدمات غځولي.
ورته مهال د لوګر ولایت د مخابراتو او معلوماتي ټکنالوجۍ رییس ښاغلي مولوي مطیع الله عابد یادونه وکړه چې د مخابراتو او معلوماتي ټکنالوجۍ وزارت، اترا اداره او ولایتي ریاست تل هڅه کوي چې د ولسونو غوښتنې واوري او هغوی ته د مقام د هدایت په اساس غوره مخابراتي چوپړ وړاندې کړي .
له فتحې وروسته د لوګر ولایت بیلابیلو سیمو کې د ګڼو مخابراتي شبکو کابو ۲۳ مخابراتي انټنونه نصب شوي چې د مکالمو سربیره انټرنټي چوپړ هم وړاندې کوي او همدا راز یاد ولایت کې تر دې دمه د ۳۳ مخابراتي سایټونو ظرفیت ۴جي ته لوړ شوی او لا هم یاد ولایت کې د کیفیت د ښه کولو په موخه د سایټونو پر ارتقاء کار روان دی.
د یادونې وړ ده د لوګر ولایت هغه سیمې چې هیڅ راز مخابراتي آسانتیاوې یې نه درلودې د اترا ادارې د ټي ډي اف لسمې پروژې له مخې ورته ۹ مخابراتي سایټونه په نظر کې نیول شوي چې له ډلې یې ۲ ګټې اخیستنې ته چمتو او د پاتې مخابراتي سایټونو رغنیزې چارې روانې دي.
