د فري فايټ افغان اتلان وستايل شو
د مخابراتو او مالوماتي ټيکنالوجۍ سرپرست وزير انجينر سيد احمد شاه سادت نن د فري فايټ افغان اتلان وستايل. په دغه ناسته کې د فري فايټ د نړېوالو اتلوليو ګټونکی او د افغانستان د ملي امنيت سفير ښاغلي احمد ولي هوتک، ښاغلي عبدالواسع قيومي، احمد سهراب سيفي او د دوی روزونکو ته د ستاينليکونو تر څنګ د "سلام" ځانګړې شمارې ډالۍ شوې.
سرپرست وزير د سوليزې ذهنيت سازۍ لپاره د سپورت په اهميت رڼا واچوله او همدا راز يې د لوبو د ډګر له اتلانو سره زمونږ د خلکو په تړليو احساساتو خبرې وکړې.
د فري فايټ د اتلانو په استازيتوب احمد ولي هوتک خبرې وکړې او د سرپرست وزير له تشويق نه يې مننه وکړه. هغه هوډ څرګند کړ چې په راتلونکي کې به هم هېواد ته د بريا زېري راوړي.
