د عوایدو راټولولو او سوداګريزو جوازونو اخيستلو لپاره د آسان خدمت لومړی مرکز پرانېستل شو
چهارشنبه ۱۳۹۷/۱۰/۱۲ - ۱۲:۴۳
د مخابراتو او معلوماتي ټکنالوجۍ وزیر محترم شهزاد آريوبي نن د ماليې وزارت سرپرست وزیر محترم ډاکټر محمد همايون قيومي په ملتيا د عوایدو راټولو او عامه خدماتو لپاره د آسان خدمت لومړنی مرکز پرانېست.
په دغه مرکز کې به د وړو او منځنیو مالیه ورکوونکو سربېره د پانګه اچوونکو لپاره د پیسو د تحویلولو په موخه بانکي آسانتیاوې، د سوداګریزو جوازونو او د کار د جوازونو ترلاسه کولو آسانتیاوې د یو سوداګریز کمپلکس په بڼه موجودې وي.
محترم شهزاد آريوبي وویل، د مخابراتو وزارت آسان خدمت اداره هڅه کوي چې د عامه خدماتو پروسې ساده او اسانه کړي، هېوادوالو او پانګوالو ته د ماليې ورکولو په برخه کې اسانتياوې رامنځته کړي او ددغه مرکز جوړول يې یوه بېلګه ده.
دا مرکز د مخابراتو او معلوماتي ټکنالوجۍ وزارت له خوا په عصري ټکنالوژۍ او د سګټاس په سیستم سمبال دی چې ټول کارکوونکې د اسان خدمت ادارې له خوا روز شوي .
ښاغلي اريوبي ددغه مرکز د پرانېستې په مراسمو کې زیاته کړه چې د مخابراتو وزارت غواړي ددغه مرکز سره انلاين خدماتو ته لاره برابره کړي، د بېمې خدماتو، TIN نمبر اخیستلو او د پُستي خدماتو لپاره هم زمینه سازي هم وکړي.
