د ختیځ زون د خلکو شوراګانو د مخابراتو او معلوماتي ټکنالوجۍ وزارت تخنیکي مرستیال سره وکتل
د روان ۱۳۹۵ کال د تلي د میاشتې په ۴ مه نیټه د ننګرهار، کنړ، لغمان او نورستان ولایتونو د شوراګانو استازو د مخابراتو او معلوماتي ټکنالوجۍ وزارت تخنیکي مرستیال ښاغلي احمد شاه سادات سره د هغه په دفتر کې وکتل.
په دغه کتنه کې پخواني سناتور ښاغلي عبدالخالق حسیني د نور په استازیتوب خبرې وکړې ، ښاغلي سادات ته د مخابراتو وزارت د تخنیکي مرستیال په توګه د هغه د ټاکنې په مناسبت مبارکي وویله، د چارو په سرته رسولو او هیواد ته د ښه خدمت کولو په لاره کې ورته د بریالیتوب هیله وکړه.
همدا راز هغوی ژمنه وکړه چې د هیواد په ختیخو سیمو کې د مخابراتو او معلوماتي ټکنالوجۍ وزارت سره له نږدې همکاري وکړي او نه پریږدي چې د دغه سکتور خدمتونو ته زیان ورسیږي. همدارنګه هغوي د مخابراتو وزارت له مشرتابه څخه غوښتنه وکړه چې د ختیځو سیمو د مخابراتي سکتور د خدمتونو د لا ښه والي لپاره جدي پاملرنه وکړي.
وروسته ښاغلي احمدشاه سادات ختیځ زون د خلکو استازو ته د ښه راغلاست په ویلو سره د هغوي د ښه نیت او همکاریو څخه خوښي څرکنده کړه او ژمنه یې وکړه چې د هیواد د ختیځو سیمو د مخابراتي خدمتونو د لا ښه کولو په لاره کې هیڅ ډول هڅه نه سپموي.
