د افغان پُست له لارې د سلام سیمکارتونو پلورل:
سهشنبه ۱۳۹۸/۹/۲۶ - ۱۳:۶
نن سه شنبه د لېندۍ میاشتې ۲۶ نېټه، د مخابراتو او معلوماتي ټکنالوژۍ وزارت (افغان پست ریاست) تر مېنځ د همکارۍ هوکړه لاسلیک شوه.
د دغه تړون له مخې، به له دې وروسته په ټول هیواد کې د سلام مخابراتي شرکت سیمکارتونه په اصلي بیه، د افغان پست پلور مرکزونو له لاري پلورل کیږي.
د پست ادارې رییس احمد وحید ویس، په دې اړه خبریالانو ته وویل: «دغه تړون په ټول افغانستان کې د افغان پست نمایندګیو له لارې د سلام سیمکارتونو پلورلو او دواړو ادارو تر مېنځ د همکاریو پېاوړې کولو په موخه لاسلیکیږي.
نوموړی زیاتوي، د پست ریاست د وروستیو فعالیتونو او هڅو له امله، د دغې ادارې کلنی عاید له ۱۴۰ میلیونه افغانیو څخه شاوخوا اته سوه میلیونه افغانیو ته لوړ شوی.
په دغه ناسته کې د افغان تلیکام شرکت مرستیال انجنیر محمد شریف وویل: «د دغې هوکړې له لاسلیکولو وروسته به د سلام شرکت سیمکارتونو وېش په برخه کې شته ستونزې راکمې شي او هیوادوال کولای شي د ټول هیواد په کچه دغه سیمکارتونه د پست ادارې له پلور مرکزونو څخه تر لاسه کړي.»
د دغه تړون له مخې به په ټول هیواد کې د سلام مخابراتي شبکې سیمکارتونه له پنځوس افغانۍ مصرفي حساب سره یو ځای یوازې د (سل افغانیو) په بدل کې تر لاسه کړي.
