د افغانستان د پشه یی ټولنې استازو د مخابراتو او معلوماتي ټکنالوجۍ تخنیکی مرستیال سره وکتل
د افغانستان میشتو پشه يي ځوانانو استازو، مخورو، روڼ آندو او د پشه يي ځوانانو متعهدي ټولنې رئیس ښاغلي حنیف الله غمخور پشه يي او د یادي ټولني مرستیال ښاغلي محمد رضا علی زاده نن ورځ د مخابراتو او معلوماتي ټکنالوجۍ مرستیال وزیر ښاغلي سیداحمدشاه سادات سره د هغه په کاري دفتر کې ولیدل. د یادو ځوانانو د لیدنې موخه د ښاغلي سادات صیب ته د نوي دندي د مبارکی ویلو تر څنګ په ټول هیواد کې د مخابراتي خدمتونو د زیربناؤ څخه د پوره ساتنې او د یادو وزارت له کړنو او راتلونکو پلانونو څخه د پوره ملاتړ او حمايي ژمنه وکړه.
د یادولو وړ ده چي د پشه يي قوم استازو له تخار، بامیان او ختیځو ولایتونو (ننګرهار، لغمان، کنړ او نورستان) څخه تشریف راوړی وو، دوی زیا ته کړه چې د پشه يي قوم ډیری اوسیدونکې په کلیوالو او لیري پرتو سیمو کې ژوند کوي نو له دي امله يي یادو سیمو ته د مخابراتي او انټرنیټي خدمتونو د غځولو غوښتنه وکړه او د مخابراتي او انټرنیټي خدمتونو د کیفیت د لوړوالي او بیو د ټیټوالي وړاندیز يي هم وکړ.
همدارنګه د یادي ټولنې استازو د خپلو مدنې حقوقو په نظر کې نیولو سره هیله څرګنده کړه چې دوی ته د غوره مخابراتي خدمتونو سره سره د ځوان نسل د سالمې روزنې په موخه د انټرنټ مراکز جوړ کړي تر څو زده کړیالان او ځوان نسل وکولای شي چي له پرمختللیو منابعو څخه کره، موثق او تازه معلوماتو ته لاس رسی ولري او د هیواد په بیا رغوونه کې پوره برخه واخلي.
ښاغلي سادات د پشه يي ځوانانو، مخورو، روڼ آندو او د ولایاتو د استازو له هراخیز ملاتړ څخه مننه وکړه او د دوی وړاندیزونه يي په ورین تندي واوریدل او د مخابراتي او انټرنیټي خدمتونو ته د لاس رسي او د ستونزو د حل په موخه يي د هر اړخیزو همکاریو ژمنه يي وکړه.
