د مخابراتو او معلوماتي تکنالوژۍ وزارت سرپرست د انټرنیټي خدمتونو د بهیر په اړه خبرې وکړې وې ویل، د افغان ټلیکام د انټرنیټي خدمتونو او بیې ارزونه پیل شوی ده او ژر به د انټرنیټي قراردادونو د ارزونې راپور له جمهوري ریاست سره شریک شي.

وروسته د هېواد جمهوررئیس په دې اړه وویل چې حکومت او خلک د انټرنیټي خدمتونو له کیفیت په ځانګړي ډول د افغان ټلیکام انټرنیټ له بیې څخه راضي نه دي. هغه لارښوونه وکړه چې په دې اړه دې عملي طرحه ترتیب او د هغې د عملي کېدو په خاطر دې جدي اقدامات وشي.

جمهوررئیس غني دغه راز زیاته کړه چې د انټرنیټي خدمتونو د وړاندې کولو او مکالمو په طریقه دې غور وشي. هغه د افغان ټلیکام مخابراتي شرکت د انټرنیټ د کفیت په ښه والي، د بیې په ټیټوالي او د کاري وړتیا پر لوړوالي هم ټینګار وکړ.

د مخابراتو او معلوماتي ټکنالوژۍ وزارت مسوولینو وویل، د انټرنیټي او مخابراتي خدمتونو د پیاوړتیا په اړه زموږ لومړنۍ ارزونې ښیي چې په دې برخه کې ظرفیت (وړتیا) شته او موږ د وړاندې کېدونکوخدمتونو د ښه والي لپاره هڅه کوو. هغوی زیاته کړه، د انټرنیټ د بیې او کیفیت په برخه کې به د پام وړ وړ ټیټوالي را شي.