تر راتلونکو شپږو مياشتو د شهيدانو وارثينو او معلولینو د استحقاق ورکولو پروسې ساده او الکټرونيکي کېږي
سهشنبه ۱۳۹۸/۴/۱۱ - ۱۶:۲۰
نن سه شنبه د ۱۳۹۸ل د چنګاښ ۱۱مه نېټه د مخابراتو او معلوماتي ټکنالوجۍ وزارت د شهیدانو او معلولینو په چارو کې د دولت وزارت سره د ۱۳ ميليونه افغانيو په ارزښت هوکړه لیک لاسلیک کړ چې د مخابراتو او معلوماتي ټکنالوجۍ وزارت په مالي همکارۍ د شهيدانو وارثينو او معلولینو د استحقاق ورکولو پروسې ساده او الکټرونيکي کړي.
د مخابراتو او معلوماتي ټکنالوجۍ وزارت سرپرست محترم محمد فهيم هاشمي د دولتي ادارو سره د اسان خدمت د همکارۍ يادونه وکړه او ويې ویل: " موږ په دولتي ادارو کې د عامه خدماتو د ساده سازۍ، الکټرونيکي سازۍ او آساده او رڼو خدماتو د وړاندې کولو په هڅه کې يوو چې دا هوکړه لیک په دې برخه کې زموږ د لاسته راوړنو یوه بېلګه ده.
ښاغلي هاشمي زیاته کړه که د مخابراتو او معلوماتي ټکنالوجۍ وزارت خلکو ته د ښه خدماتو وړاندې کولو، الکټرونيکي حکومتدارۍ پراختيا، د فعاليتونو په دوام، د روڼتيا د زیاتېدا او د خلکو او دولت تر منځ د واټن له منځه وړلو په موخه په خوست او کندهار ولايتونو کې د آسان خدمت مراکز جوړوي چې وروسته به يې فعالیتونه په ټولو ولايتونو کې پراختيا ومومي.
د مخابراتو او معلوماتي ټکنالوجۍ سرپرست وزیر وویل چې د شهیدانو او معلولینو په چارو کې د دولت وزارت کارکوونکو د ظرفيت لوړونې پروګرامونو تر څنګ به دغه وزارت ته د عامه خدماتو مرکز ډيزاین او جوړ کړي چې مراجعينو ته به زیاتې اسانتياوې رامځته کړي.
د شهيدانو او معلولینو په چارو کې د دولت وزیر محترم لعل الدين آريوبي د مخابراتو او معلوماتي ټکنالوجۍ وزارت له مشرتابه او آسان خدمت ادارې له تخنيکي کارکوونکو مننه وکړه چې د عامه خدماتو پروسو په ساده سازۍ کې يې ددوی سره همکاري وکړه او زیاته يې کړه چې د مرکز په جوړېدو او د پروسو په ساده سازۍ او الکټرونيکي سازۍ سره به اسانتياوې رامنځته او د اداري فساد په برخه کې به رغنده رول ولوبوي.
دغه سيسټم د ادارو سره د حساب ورکولو او روڼتيا رامنځته کولو په برخه کې مرسته کوي او خلکو او دولت تر منځ شته فاصله را لنډوي.
