د مخابراتو او معلوماتي ټکنالوجۍ وزیر په کابل کې د قزاقستان شارزدافیر سره وکتل
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني کابل کې د قزاقستان د سفارت شارزدافیر سره د ډیجیټل حکومتولۍ، ټکنالوجۍ او د مخابراتي سکټور د او اړونده نورو برخو په تړاوخبرې وکړې.
د مخابراتو او معلوماتي تکنالوجۍ وزیر په دې لیدنه کې د قزاقستان هېواد شارژدافیر او مل پلاوي ته د ښه راغلاست ویلو تر څنګ څرګنده کړه چې کابل او استانه لرغوني اړیکې لري او د خپلو ملي ګټو د خوندیتوب په اساس د ګاونډیو او سیمه ییزو هېوادونو سره د ښو اړیکو غوښتونکي یو.
د مخابراتو او معلوماتي تکنالوجۍ وزیر وویل، افغانستان ۴۰ کاله په جګړو کې ښکېل هیواد و او اوسمهال د ودې او ټیکاو په حالت کې قرار لري چې د همدې فرصت څخه په استفادې غواړو د دوه اړخیزو همکاریو پربنسټ د هېواد په پرمختګ کې په ځانګړي ډول د ټکنالوجۍ په برخه کې آغېزمن پرمختګ ولرو.
د مخابراتو او معلوماتي ټکنالوجۍ وزیر زیاته کړه چې اوس له نیکه مرغه مونږ په دغې سکټور او د ټول هېواد په کچه د ټکنالوجۍ په برخه کې مجرب کادرونه لري او کولی شو د همکارو هېوادونو د تجربو په کارولو سره د ټکنالوجۍ په برخه کې ښه پرمختګونه ولرو.
په کابل کې د قزاقستان د شارزدافیر ښاغلي ګازیز اکباسوف، افغانستان د آسیا لپاره یو مهم هېواد په توګه یاد کړ او ویې ویل چې د افغانستان ثبات د دې هیواد د ځانګړي جغرافيايي موقعیت له امله د آسیا ټولو هېوادونو ثبات دی او کولی شي چې آسیايي هېوادونه په یو اقتصادي دهلېز کې سره ونښلوي او د پرمختګ کې په برخه کې همکاري وکړي.
محترم اکباسوف څرګنده کړه چې د قزاقستان هېواد د ټکنالوجۍ د ودې او پراختیا په برخه کې له افغانستان سره همکارۍ ته ژمن دی او هغه تجربې چې د ټکنالوجۍ په سکټور کې لري، د افغانستان له کادرونو سره شریکوي، همداراز نوموړي زیاته کړه چې دوی ژمن دي چې د ټکنالوجۍ په برخه کې افغان تخنیکي کادرونو د ظرفیت لوړولو، سیستم جوړونې او دیجيتل حکومتولۍ په برخو کې هم همکاري پاتې شي
همداراز په دې لیدنه کې د مخابراتو او معلوماتي ټکنالوجۍ وزارت تخنیکي معین محترم پوهنیار استاد احمد مسعود لطیف رای، د مخابراتو او معلوماتي ټکنالوجۍ وزارت مهمو ټکنالوجیکي برخو په اړه چې وزارت یې د پلي کېدو هوډ لري قزاقستاني لوري سره معلومات شریک کړل او په دې برخه کې د دواړو لوریو له خوا استازي هم وټاکل شول ترڅو یادې شوي موضوعګانې تعقیب او د پایلو په اړه يې نظرونه تبادله کړي.
